Պուտինը խոսել է իր նմանակների մասին (տեսանյութ)

ՌԴ նախագահ Վլադիմիր Պուտինը խոստովանել է, որ իր անվտանգությունն ապահովելու համար 2000-ականների սկզբին մտածում էին նմանակների օգտագործել, սակայն ինքը հրաժարվել է այդ մտքից: Այս մասին նախագահը պատմել է ՏԱՍՍ-ին տված հարցազրույցի ժամանակ:  

«Միտքն առաջացավ, սակայն ես հրաժարվեցի նմանակներից,- նշել է նա: Դա ահաբեկչության դեմ պայքարի ամենածանր ժամանակաշրջանն էր»: Նրա խոսքերով, 2000-ականների սկզբին առաջարկներ էին լինում, որ ՌԴ առաջնորդին փոխարինի նմանակը տեղերում արվող միջոցառումների ժամանակ, որտեղ երկրի ղեկավարի ներկայությունն անվտանգ չէ: Սակայն Պուտինն, ըստ իր խոսքերի, ոչ մի անգամ չի դիմել նմանակների օգնությանը:

«Արդյո՞ք Պուտինը նմանակ ունի» հարցը երկրի ղեկավարն ու նրանից հարցազրույց վերցնող լրագրող Անդրեյ Վադենկոն նկատել են, որ ՌԴ նախագահի մասին համացանցում ամենահաճախ փնտրվող հարցերից է: Բայց այն 20 տարի առաջ էլ էր մարդկանց մոտ հետաքրքրություն առաջացնում: Այսպես, 2001 թվականի դեկտեմբերի 24-ին այս մասին ուղիղ եթերով Վլադիմիր Պուտինին հարց ուղղեց Կոստրոմայի շրջանի բնակչուհին: 

 Կինն առաջարկել էր, որ նմանակը նախագահին կօգնի հասցնել մասնակցել բազմաթիվ հանդիպումներին, այդ թվում եւ բարձր մակարդակի հանդիպումներին: Այն ժամանակ Պուտինը պատասխանել էր, որ ինքը նմանակ չունի: Նմանատիպ միջադեպ էլ պատահել էր 2009 թվականի օգոստոսին Սոչիում: Պուտինը եւ այն ժամանակվա ՌԴ նախագահ Դմիտրի Մեդվեդեւն աշխատանքային հանդիպումից հետո որոշել էին զբոսնել քաղաքում՝ քաղաքի բնակիչների եւ հյուրերի հետ: Նրանց տեսնելով՝  մի կին ենթադրել էր, որ զբոսնում են ոչ թե երկրի նախագահն ու վարչապետը, այլ նրանց նմանակները: «Ոչ, նմանակները չեն, այլ իսկականներն են»,- ժպիտով պատասխանել էր Մեդվեդեւը: