Չինաստանում կինը պաշտպանիչ դիմակ չունենալու պատճառով ընձուղտի հագուստով է հիվանդանոց գնացել (տեսանյութ)

Համացանցում տեսանյութ է տարածվել, որում Չինաստանում տարածված նոր տեսակի կորոնավիրուսից պաշտպանվելու համար կինը հիվանդանոց ընձուղտի կոստյումով է գնացել, հայտնում է odditycentral.com կայքը:

Ականատեսներից մեկը չինական Pear Video հարթակում տեսանյութ է տեղադրել, որում երևում է, թե ինչպես է ընձուղտի հագուստով կինը Չինաստանի հարավ-արևմտյան մասում գտնվող հիվանդանոցներից մեկում մի բաժանմունքից մյուսն անցնում: Նշվում է, որ այցելուն հիվանդանոց է գնացել հորը տեսակցելու համար, որը մինչև կորոնավիրուսի բռնկումը շնչառական խնդիրների հետևանքով է այդտեղ հայտնվել:

Նշվում է, որ կնոջ ձեռքի տակ եղած միակ դիմակի օգտագործման ժամկետն ավարտվել է դեռևս 2017 թվականին, իսկ նոր դիմակ չի կարողացել գնել դրանց բացակայության պատճառով: Նա, վախենալով, որ դիմակը չի կարող իրեն պաշտպանել կորոնավիրուսից, ստիպված ընձուղտի բեմական հագուստ է գնել և դրանով տնից դուրս եկել:

Իշխանությունների համաձայն` նման հագուստները չեն կարող կորոնավիրուսից մարդկանց պաշտպանել:

Չինաստանի Հուբեյ նահանգում նոր տեսակի կորոնավիրուսի հետևանքով զոհերի թիվը հասել է 2029-ի:

Նշվում է, որ վարակվածների թիվն անցել է 60 հազարը (62 031):

Ընդ որում, ավելի քան 10 հազար հիվանդ արդեն լավացել է: