Պելեն ընկճախտի մեջ է. Փակվել է տանը

Ֆուտբոլի արքա Պելեն կորցրել է ինքնուրույն տեղաշարժվելու ունակությունը կոնքազդրային հոդի վիրահատությունից հետո: Այս մասին հայտնել է լեգենդար ֆուտբոլիստի որդին, որը նաեւ նշել է, որ 79-ամյա հայրն ընկճախտի մեջ է:

«Նա շատ է ամաչում, փակվել է տանը: Պատկերացրեք՝ նա արքա է, միշտ ազդեցիկ դեմք է եղել, իսկ այժմ չի կարողանում նորմալ քայլել: Նա ամաչում է, չի ցանկանում փողոց դուրս գալ, չի ուզում, որ իրեն նկատեն, ընդհանրապես չի ուզում տնից դուրս գալ: Այժմ նա բավականին թույլ է: Նա վիրահատություն է տարել կոնքազդրային հոդի վրա, սակայն վերականգնողական շրջանն այնքան էլ իդեալական չէր: Այդ պատճառով նա հիմա խնդիրներ ունի տեղաշարժվելու հետ կապված, ինչն էլ նրա ընկճախտի պատճառն է»,-Globo Esporte-ին ասել է ֆուտբոլիստի որդին՝ Էդինյոն: 

Հիշեցնենք, որ Պելեն 4 անգամ մասնակցել է Աշխարհի առաջնություններին եւ դրանցից 3-ում դարձել չեմպիոն: Այս ցուցանիշով Պելեն միակն է աշխարհում: Ընդ որում իր առաջին առաջնության ժամանակ՝ 1958 թվականին նա ճանաչվել է ամենաերիտասարդ, իսկ վերջինում՝ 1970-ում ամենաթանկարժեք ֆուտբոլիստ: 

Բրազիլիայի ազգային հավաքականի կազմում Պելեն խփել է 77 գոլ, ինչը լավագույն արդյունքն է հավաքականի համար: Ընդամենը Պելեն խփել է 1298 գոլ եւ այդ արդյունքով էլ նա լավագույնն է աշխարհում: Պաշտոնական խաղերում Պելեն հաջողության է հասել 767 անգամ: 

Պելեն նաեւ միակն է այն առումով, որ իր կյանքում երրորդ անգամ ամուսնացել է համեմատաբար վերջերս՝ 75 տարեկան հասակում: 

Top-News.am