Մեծ Բրիտանիային է մոտեցել վերջին 7 տարում ամենահզոր մրրիկը

Մեծ Բրիտանիային է մոտեցել «Սիարա» մրրիկը: Այն արդեն անվանել են վերջին 7 տարում ամենահզորը: Տեղատարափ անձրեւների եւ ուժգին քամու պատճառով արդեն չեղարկվել են հարյուրավոր ավիաչվերթներ: Երկաթուղային շատ կայարաններ գնացքները կանգնեցրել են, հայտնում է «ՌԻԱ Նովոստի»-ն:

Լոնդոնում փակվել են բոլոր ութ թագավորական այգիները: Երկրում հազարավոր շենքեր առանց էլեկտրականության են մնացել: Ափամերձ շրջաններում քամու ուժգնացումը հասնում է ժամում 120 կիլոմետրի: Լրատվամիջոցները հայտնում են արմատախիլ եղած ծառերի եւ դրանց տակ ճզմված ավտոմեքենաների մասին:

Կամուրջներիրց շատերը փակ են բեռնատարների երթեւեկության համար: Միացյալ Թագավորության մի մասը ջրածածկ է եղել: Իսկ Շոտլանդիայում եւ Հյուսիսային Իռլանդիայում սպասվում են ձյան տեղումներ:

Վատ եղանակի պատճառով Մեծ Բրիտանիայի թագուհի 93-ամյա Եղիսաբեթ II-ը, որը հիմա Նորֆոլքում է, հրաժարվել է գնալ կիրակնօրյա եկեղեցական պատարագին: