Ճապոնիայի ջրերում գտնվող կրուիզային նավի 10 ուղևորի մոտ կորոնավիրուս է հայտնաբերվել

Ճապոնիայի Յոկոհամայի նավահանգստի մերձակա ջրերում Diamond Princess կրուիզային նավում 10 ուղևորի մոտ 2019-nCoV նոր տեսակի կորոնավիրուս է հայտնաբերվել, հայտնում է ՏԱՍՍ գործակալությունը:

«Մենք բուժզննում իրականացրինք նավի բոլոր ուղևորների և անձնակազմի համար: Անալիզներ են վերցվել 273 հոգուց, որոնք կա՛մ շփում են ունեցել վարակվածների հետ, կա՛մ հիվանդության ախտանշաններ են ունեցել: Այս պահին մենք ստացել ենք 31 մարդու թեստի պատասխանները, որոնցից 10-ը դրական են»,- Տոկիոյում տեղի ունեցած մամուլի ասուլիսի ժամանակ նշել է առողջապահության նախարար Կացունոբու Կատոն:

Նավի վրա ընդհանուր առմամբ գտնվում է 3700 ուղևոր և անձնակազմի անդամ:

Կացունոբու Կատոյի խոսքով` բոլոր վարակվածները հոսպիտալացվել են, նրանց վիճակը գնահատվում է նորմալ: Հիվանդներին ափ է հասցրել առափնյա պահակախումբը, քանի որ նավը նավահանգիստ մտնելու թույլտվություն չի ստացել: Հիվանդներին տեղափոխել են Կանագավա պրեֆեկտուրայի հիվանդանոցներից մեկը:

Նավը Յոկոհամայից դուրս է եկել հունվարի 20-ին և վերադարձել փետրվարի 3-ին: Ճանապարհին այն մտել է ճապոնական Օկինավա և Կյուսյու կղզիների, ինչպես նաև Հոնկոնգի և Վիետնամի նավահանգիստներ:

Վարակված 80-ամյա մի տղամարդ նավում է եղել հունվարի 20-25-ը և իջել է Հոնկոնգում: Ներկայում նա հոսպիտալացվել է, վիճակը գնահատվում է կայուն:

Չինաստանում նոր տեսակի կորոնավիրուսի հետևանքով մահացածների թիվը հասել է 479-ի, վարակվածների թիվը գերազանցել է 16 600-ը:

Նշվում է, որ փետրվարի 4-ին գրանցվել է վարակման 3156 նոր դեպք: Միևնույն ժամանակ, 1967-ն արձանագրվել է Ուհան քաղաքում, որտեղից սկիզբ է առել համաճարակը:

Վերջին օրերին ամբողջ աշխարհում մարդիկ խուճապի են մատնվել սրընթաց տարածվող մահացու կորոնավիրուսի պատճառով: Հիվանդների ու զոհերի թիվն օրեցօր ավելանում է, իսկ վարակման դեպքեր են արձանագրվել նաև Չինաստանից դուրս մի շարք երկրներում, ինչը հանգեցրել է համաշխարհային խուճապի:

Այս թեմայով Դանիան առաջինը Եվրոպայում հանել է COVID-19-ի պատճառով մտցված բոլոր սահմանափակումները Պատվաստումների մասին կեղծ տեղեկություններ տարածողների նկատմամբ պետք է ձեռնարկվեն ամենախիստ միջոցները.Վլադիմիր Կրուգլի Մեծ Բրիտանիայի իշխանությունները ՃՏՊ-ի զոհերի մահը վերագրել են COVID-19-ին. Daily Mail Լոնդոնում հակակորոնավիրուսային սահմանափակումների հնարավոր խստացման դեմ բողոքի ցույց է անցկացվել Ռումինիայում հարյուրավոր ծնողներ բողոքի ցույցի են դուրս եկել՝ պահանջելով չեղարկել դպրոցներում դիմակներ կրելու պարտադիր պահանջը