Սիլվիո Բեռլուսկոնին կոչ է արել Արևմուտքին կառուցողական հարաբերություններ հաստատել Ռուսաստանի հետ

Իտալիայի նախկին վարչապետ Սիլվիո Բեռլուսկոնին հայտարարել է, որ Ռուսաստանը կայունության գործոն է հանդիսանում, և Արևմուտքը պետք է նրա հետ կառուցողական համագործակցության հարաբերություններ հաստատի` այդ թվում սուր միջազգային ճգնաժամերի լուծման համար: Այս մասին տեղեկացնում է РИА Новости գործակալությունը:

«Երկար տարիներ է, ինչ Պուտինի գլխավորած Ռուսաստանը կայունության գործոն է հանդիսանում: Արևմուտքը պետք է իրեն հաշիվ տա և հասկանա, որ մեր մշակույթի և եվրոպական քաղաքակրթության զգալի մասը հանդիսացող Ռուսաստանի հետ միայն կառուցողական հարաբերություններով է հնարավոր լուծել այնպիսի ճգնաժամեր, ինչպիսին մերձավորարևելյանն է»,-հայտարարել է հայտնի քաղաքական գործիչը:

Բեռլուսկոնին սուր քննադատության է ենթարկել Եվրոպական միության կողմից միասնական արտաքին քաղաքականության բացակայությունը, ինչը, մասնավորապես, լավ երևում է միջազգային ճգնաժամերը լուծելու փորձերի ժամանակ:

«Միայն այն Եվրոպան, որը կարողանա միասնական արտաքին քաղաքականություն վարել և ունենալ ընդհանուր ռազմական միջոցներ, կկարողանա իր դերակատարությունն ունենալ: Եվ միայն Ռուսաստանի հետ այլ հարաբերությունները թույլ կտան կայունացնել այս շրջանը»,- ընդգծել է Իտալիայի նախկին վարչապետը:

Բեռլուսկոնին կարծիք է հայտնել, որ ժամանակակից աշխարհում Արևմուտքի հիմնական մրցակիցը Չինաստանն է, որը «քաղաքական միջոցներով հետևում է իմպերիալիստական ծրագրերին` իր տնտեսական նպատակների համար»: