Օմսկում երեխաներին Պուտինի նկարով կոնֆետներ են բաժանել

Ամանորյա մանկական նվերներում Օմսկի բնակիչները հայտնաբերել են «Նախագահ» կոնֆետներ՝ Պուտինի լուսանկարով: Կոնֆետների լուսանկարը հրապարակել է «ВКонтакте» սոցցանցում Անտոն օգտատերը, որն ավելացրել է, որ կոնֆետներն ուտել դեռ չի փորձել, քանի որ կոնֆետի բաղադրության մեջ կան օղի եւ չիլի պղպեղ:

«Նախագահ» կոնֆետներն արտադրում է «Джи Си – Золотые конфеты» ընկերությունը Սանկտ-Պետերբուրգից: Ընկերության կայքում կոնֆետի նկարագրության բաժնում գրված է, որ տրյուֆելում արտացոլվում են երկրի ղեկավարի հիմնական գծերը՝ «ինքնատիրապետումը, հանգստությունը եւ խարիզման արտացոլվում են թավշյա տրյուֆելային միջուկի կոճապղպեղային տաք նոտաներով, անաչառությունը, անկանխատեսելիությունը եւ սրամտությունը՝ չիլի պղպեղի բացվող կծվությունում»: