Ճապոնիան խոստացել է խստացնել իմիգրացիոն ստուգումները սահմանին Կառլոս Գոնի փախուստից հետո

Ճապոնիայի արդարադատության նախարար Մասակո Մորին կիրակի հայտարարել է, որ Nissan ընկերության նախկին գլխավոր տնօրեն Կառլոս Գոնի փախուստը աններելի է, եւ խոստացել է խստացնել իմիգրացիոն ստուգումները սահմանին, տեղեկացնում է Associated Press-ը։

Մորին տեղեկացրել է, որ իր հրամանով սկսվել է հետաքննություն Գոնի այն հայտարարությունից հետո, թե նա թաքնվում է Լիբանանում։

Նա նշել է, որ Տոկիոյից Գոնի հեռանալու տեսագրություններ չկան։ Մորիի խոսքով՝ Nissan-ի նախկին գլխավոր տնօրենին գրավով ազատ արձակելու միջնորդությունը մերժվել է, եւ Ինտերպոլը Գոնի հանդեպ հետախուզում է հայտարարել։

Ավելի վաղ՝ երեքշաբթի, Le Monde պարբերականը, հղում կատարելով իր աղբյուրներին, տեղեկացրել էր, որ գործողությունն իբր պլանավորել է Կառլոս Գոնի կինը՝ Քարոլը։ Պարբերականի տեղեկատվությամբ՝ Քարոլ Գոնը ամուսնու հետ միասին եղել է Բեյրութից Ստամբուլ թռչող ինքնաթիռում։ Ինչպես գրել է պարբերականը, փախուստը, հավանաբար, պատրաստվել է երկար ժամանակ, իսկ դրա նախապատրաստմանը մասնակցել են նրա խորթ եղբայրները, «որոնք հիանալի կապեր ունեն Թուրքիայում»։

Ինքը՝ Գոնը, հերքում է կնոջ մասնակցությունն իր փախուստին։

Հինգշաբթի հայտնի էր դարձել, որ Թուրքիայի ոստիկանությունը կալանավորել է յոթ մարդու Կառլոս Գոնի փախուստի կազմակերպմանը հանցակցության կասկածանքով։ Բացի այդ, Լիբանանի իշխանություններն Ինտերպոլից ստացել են այսպես կոչված «կարմիր ծանուցում» Renault-Nissan-ի նախկին տնօրենի կալանավորման միջազգային օրդերի մասին։

Առաջիկա օրերին, հավանաբար հունվարի 8-ին, Գոնը պետք է տա փախուստից հետո առաջին մամուլի ասուլիսը։ Ինչպես տեղեկացնում են ֆրանսիական լրատվամիջոցները, գործարարն անձամբ կընտրի լրագրողներին, որոնց թույլ կտան մասնակցել այդ հանդիպմանը։