Թրամփն Աֆղանստանի ամերիկյան ռազմաբազայում հաց է կիսել զինծառայողների հետ (լուսանկարներ)

ԱՄՆ նախագահ Դոնալդ Թրամփը չհայտարարված այցով մեկնել է Աֆղանստանում տեղակայված Բագրամ ամերիկյան ավիաբազա և զինծառայողների առջև հանդես եկել ելույթով, հայտնում է BBC News լրատվականը:

Այցը համընկել է ԱՄՆ-ում նշվող Գոհաբանության օրվա հետ: Դոնալդ Թրամփը սկզբում ճաշարանում օգնել է սննդի բաժանման ժամանակ, այնուհետև ընթրել է զինվորների հետ` համտեսելով հնդկահավ, կարտոֆիլի պյուրե և եգիպտացորենի ալյուրից պատրաստված հաց: Ռազմակայանում անցկացրած 2,5 ժամվա ընթացքում նա հասցրել է ելույթ ունենալ զինծառայողների առջև և հանդիպել երկրի նախագահ Աշրաֆ Ղանիի հետ: Թրամփը նաև հայտարարել է զորքի մի մասի դուրսբերման և «Թալիբան» ծայրահեղական շարժման հետ խաղաղ բանակցությունների մասին:

Տեղեկությունների համաձայն` անցած տարի ԱՄՆ նախագահի՝ Իրաք մեկնելու մասին լուրերը տարածվել էին մինչև նրա նպատակակետ հասնելը, օդանավի տեղաշարժին հետևել էին ավիացիոն էնտուզիաստները: Այս տարի նախապատրաստական աշխատանքներն իրականացվել են խիստ գաղտնիության պայմաններում: Լրագրողների ոչ մեծ խմբին հավաքել են բազմահարկ կայանատեղիի տանիքին և սև միկրոավտոբուսներով հասցրել ինքնաթիռի մոտ` վերցնելով վերջիններիս հեռախոսները: Թրամփի ժամանակացույցում նշված է եղել մեկ այլ իրադարձություն, իսկ նրա մշտական ինքնաթիռը մնացել է Ֆլորիդայում: Պահեստային օդանավը թռիչքն իրականացրել է պատուհանների փակ վարագույրներով:

Ինչպես ավելի վաղ նշել էր tert.am-ը, անցյալ շաբաթ Թրամփը հեռախոսազրույց է ունեցել աֆղան պաշտոնակցի հետ և նրան հրավիրել Վաշինգտոն: Ղեկավարները քննարկել են նաև «Թալիբան» ծայրահեղական շարժման հետ խաղաղություն կնքելու մասին 7 կետից բաղկացած ծրագիրը: