Հենոն քանի դեռ ֆուտբոլ է խաղում, պետք է լինի հավաքականի ավագը. Սարգիս Հովսեփյան (տեսանյութ)

Հայաստանի ազգային հավաքականի ավագ Հենրիխ Մխիթարյանը քանի դեռ ֆուտբոլ է խաղում, պետք է լինի հավաքականի ավագը, իսկ հավաքականի տղաներին բավական է քննադատելպարտությունների համար բոլորս ենք մեղավոր: Այս մասին Tert.am-ի հետ զրույցում ասաց Ֆուտբոլի ազգային հավաքականի նախկին ավագ, նախկին մարզիչ Սարգիս Հովսեփյանը:

«Բոլորը քննադատում եմ մեր տղաներին, բայց ինձ թվում է՝ ինչ-որ չափով բավական է, որովհետև քննադատությունը պետք է արդյունավետ լինի, եթե հենց այնպես՝ շատ վատ բառերով քննադատում ես ֆուտբոլիստին, ցանկացած մարդ, ոչ միայն մարզիկ, այդ քննադատությունը չի ընդունում, իսկ եթե տեղին ես քննադատում, նաև ֆուտբոլիստն է նայում, կարդում, ընդունում, իսկ մեր մոտ մարդիկ սովոր են հայհոյանքներով քննադատել: Ես դա չեմ ընդունում, միևնույն է, մեր տղաներն են խաղում, լինում է նաև պարտություն, ցանկացած երկիր էլ պարտվում է: Համակարգն է մեղավոր, որ ֆուտբոլիստները պարտվում են, իսկ մենք ամեն ինչ մոռացել ենք, թիրախավորում ենք նրանց ու քարկոծում ենք», -ասաց Սարգիս Հովսեփյանըՙ անդրադառնալով հավաքականի հասցեին հնչած քննադատություններին՝ Իտալիա-Հայաստան հանդիպմանը 9:0 հաշվով պարտվելուց հետո:

Հարցին, թե այդ քննադատություններն ազդո՞ւմ են մարզիկի հոգեբանության վա, Սարգիս Հովսեփյանն ասաց, որ, բնականաբար, դա ազդում է, նա չի կարող տրամադրվել, լիովին տրամադրվել խաղին: Նա նշեց, որ ֆուտբոլիստները լավ ասացվածք ունեն՝ տխրությունը պետք է տևի մեկ օր:

Հարցին՝ ո՞րն էր պարտության պատճառը, որովհետև առաջին ութ րոպեներին հինգ պաշտպանով երկու գոլ սեփական դարպասը թողնելուց հետո՝ դժվար կլիներ զսպել երկրպագուների քննադատությունները, Սարգիս Հովսեփյանն ասաց, որ չի ցանկանում քննարկել մարզիչի մարտավարությունը, սակայն կարող է ասել, որ պաշտպանությունը պետք է լինի որակյալ, և դա միայն պաշտպանների գործը չէ:

Դիտարկմանը, թե մատնանշում են, որ աշխարհում պրոֆեսիոնալ մարզիչների աշխատանքին ֆեդերացիաների նախագահները չեն միջամտում, ինչպես Հայաստանում է, Սարգիս Հովսեփյանն ասաց. «Ինչ-որ չափով կարող է դերակատարում ունենալ, բայց՝ ոչ շատ: Մեր մոտ՝ նայած մարզիչ. երբ ես գլխավորում էի հավաքականը, հավատացնում եմ, ձեզ, որ ես եմ արել, սխալվել եմ, ճիշտ եմ արել, դա իմ ընտրությունն է եղել, և դրա համար ես հանգիստ եմ»:

Հարցին՝ եթե առաջարկ լինի, կհամաձայնի՞ զբաղեցնել Հայաստանի ֆուտբոլի ֆեդերացիայի նախագահի պաշտոնը կամ ազգային ընտրանու մարզչի պաշտոնը, Սարգիս Հովսեփյանը չցանկացավ պատասխանել. «Լավ կլինի այդ հարցին հիմա չպատասխանեմ»:

Հարցին, թե ինչպե՞ս է վերաբերում ՀՖՖ նախկին նախագահ Արթուր Վանեցյանի հրաժարականին և հնարավոր համարո՞ւմ է, որ սպորտն ու քաղաքականությունը տարանջատված լինեն, Հովսեփյանն ասաց՝ հնարավոր չէ. «Սպորտն ամենամեծ քաղաքականությունն է, սպորտի միջոցով մեծ քաղաքականություն է իրականացվում, պետություններն իրենց խնդիրներն են լուծում…»:

Հովսեփյանը, պատասխանելով այն հարցին, թե երբ ինքն էր հավաքականի պաշտպան, ի՞նչ ազդեցություն էր ունենում գործկոմը, ասաց, որ նախկինում եղել են ոչ սպորտային մարդիկ, տարբեր կառույցներից պետական այրեր, ու իրենք չեն էլ իմացել, թե ովքեր են եղել այդ կազմում և որևէ առնչություն նրանց հետ չեն ունեցել:

Թե ինչպես պետք է լինի ՀՖՖ-ի գործկոմը՝ Սարգիս Հովսեփյանն ասաց.«Ֆուտբոլի մարդիկ պետք է լինեն գործկոմում, որովհետև մարդը, ով առնչվում է ֆուտբոլի հետ, ցանկացած ժամանակ կհանդիպի ֆուտբոլիստների հետ, կոգեշնչի, խորհուրդներ կտա, ֆուտբոլիստն էլ հասկանում է, թե ով է իրեն խորհուրդ տալիս, ինչ անցած ճանապարհ ունի տվյալ գործկոմի այդ անդամը, իսկ եթե գործկոմի անդամը ոչ ֆուտբոլային անձ է, ապա ինչ խորհուրդ կարող է տալ պրոֆեսիոնալ ֆուտբոլիստին այդ ոչ պրոֆեսիոնալ ֆուտբոլի անդամը»:

Դիտարկմանը, թե ՀՖՖ Ներքին աուդիտի և համապատասխանության կոմիտեի նախագահ, վարչապետի խորհրդական Մեսրոպ Առաքելյանը, օրինակ, խոսել է ավագի փոփոխության մասին, և, ինչպես գիտենք, Սարգիս Հովսեփյանն է այդ թևկապը փոխանցել Մխիթարյանին և հարցին, թե ի՞նչ կարծիք ունի այդ ամենի վերաբերյալ՝ Հովսեփյանն ասաց. «Ամեն մեկն իր կարծիքն ունի, բայց ես այդպես չեմ համարում, որովհետև Հենոն թե՛ որպես ֆուտբոլիստ, թե՛ կենցաղում ցույց է տվել, որ նա պետք է լինի մեր ավագը: Քանի նա խաղում է ֆուտբոլ, նա պետք է լինի մեր ազգային հավաքականի ավագը, որովհետև մարդն իր ֆուտբոլային կյանքով ցույց է տալիս, թե ինչ բարձունքների է հասել, որը հայկական ֆուտբոլում ոչ մեկի համար հասանելի չի եղել: Նրա ձեռքբերումները մեծ հաջողություն են, դա մեր համար պարծանք է: Հենոն շատ լավ ավագ ու լավ մարդ է: Դա կարծիք է, ինձ թվում է, որ Հենոն ուշադրություն չի դարձնի այդ կարծիքին, որովհետև ոչ պրոֆեսիոնալ կարծիք է, էմոցիաների արտահայտում է, ուղղակի»:

Իսկ թե ո՞րն է հայկական ֆուտբոլի խնդիրը՝ Սարգիս Հովսեփյանն ասաց, որ խնդիրը ազգային թիմերում լեգեոներների թիվն է, մեր տղաները չեն խաղում, խաղաժամանակ չեն ստանում, իսկ հետո չեն կարող օգնել ազգային ընտրանուն: Հարցին, թե ինչո՞ւ են լեգեոներները խաղում, Սարգիս Հովսեփյանն ասաց, որ այդտեղ խնդիր կա, տեղյակ է, թե ինչումն է խնդիրը, սակայն այդպես չի կարելի անել:

Դիտարկմանն առ այն, որ ՀՀ վարչապետ Նիկոլ Փաշինյանն ասաց, որ 2050 թվականը պետք է Եվրոպայի կամ այլ առաջնության գավաթակիր դառնա հավաքականը, ինքը հնարավոր համարո՞ւմ է, Հովսեփյանն ասաց. «Տեսեք, շատերը կան, որ ուզում են օրինակ ՀՖՖ նախագահ դառնան, բայց ոնց նայում եմ, բոլորը քննադատում են, բայց այդ մարդիկ տեսլական պետք է ունենան, ընտրություն պետք է կատարենք, ես ընտրող եմ, բայց պետք է հասկանամ, թե մարդն ինչ տեսլական ունի: Գալիս, նստում են այդ աթոռին, ինչ ուզում, անում են, հետո ասում են՝ չստացվեց: Միգուցե ասեն մեզ, մենք էլ օգնենք, խորհուրդներ տանք, թե չէ մեկ անձը չի կարող ամեն ինչ ճիշտ անել: Ինչ վերաբերում է մեր վարչապետի ասածին, ապա դա մարզասերի ցանկություն է, ես էլ եմ ցանկանում , որ աշխարհի ընտրական խաղերին մեր հավաքականը դառնա աշխարհի չեմպիոն, դա որպես մարզասեր է ասել վարչապետը, իսկ որպես պրոֆեսիոնալ դա շատ, շատ-շատ բարդ է, քիչ հնարավոր է, եկեք մեկս մյուսին չխաբենք»:

Ինչ վերաբերում է մարզչին, ապա Սարգիս Հովսեփյանն ասաց, որ ազգությունը կապ չունի, մարզիչը պետք է պրոֆեսիոնալ լինի: Հավաքականի նախկին ավագը խոսեց նաև Արաս Օզբիլիսի, Գևորգ Ղազարյանի, Յուրա Մովսիսյանի, Մարկոս Պիզելիի և նախկին մարզիչների, ինչպես նաև՝ ֆուտբոլիստների վարձատրության մասին: