Ռուսաստանը հերքում է, որ վնասել է ուկրաինական նավերը

Ուկրաինական ռազմանավերը, որոնք կալանվել էին ռուսաստանցի սահմանապահների կողմից Կերչի նեղուցում սադրանքներ իրականացնելու համար, ուկրաինական կողմին վերադարձվել են նորմալ վիճակում, ինչը հաստատում է տեսանյութը: Այս մասին հայտարարել է Ռուսաստանի անվտանգության ծառայության մամուլի ծառայությունը:

Ուկրաինական կողմը պնդում է, որ Ռուսաստանն իրենց «Նիկոպոլ» եւ «Բերդյանսկ» զրահանավակները, ինչպես նաեւ «Յանի Կապու» քարշանավը վերադարձրել են շարքից դուրս բերված վիճակում:

Ռուսաստանյան կողմը շեշտում է, որ տեսանյութով ապացուցվում է, որ ուկրաինական կողմի մեղադրանքները որեւէ հիմք չունեն:

Հիշեցնենք, որ ուկրաինական նավերը կալանվել էին Ղրիմի մոտ անցած տարվա նոյեմբերի 25-ին:

Top-News.am