Ուկրաինայի Ռովնո քաղաքում հայկական խաչքար են տեղադրել (տեսանյութ)

Ուկրաինայի Ռովնո քաղաքում հայկական խաչքար են տեղադրել՝ ի հիշատակ հայ եւ ուկրաինացի ժողովուրդների անմեղ զոհերի, հաղորդում է AnalitikaUA.net-ը:

Նոյեմբերի 1-ին Ռովնո քաղաքում, Կավկազսկայա-Միցկեվիչա փողոցի անկյունում տեղի է ունեցել հայկական խաչքարի բացման հանդիսավոր արարողությունը:

Ուկրաինական կայքի հաղորդմամբ՝ օծման արարողությունն անցկացրել են Հայ առաքելական եկեղեցու Ուկրաինայի թեմի առաջնորդ Մարկոս եպիսկոպոս Հովհաննիսյանը, Ուկրաինայի ուղղափառ եւ հռոմեա-կաթոլիկ եկեղեցիների ներկայացուցիչները:

Միջոցառմանը ներկա են եղել Ուկրաինայի հայերի միության նախագահի տեղակալներ Դավիթ Մկրտչյանն ու Արմեն Վարդանյանը, Ռովենի մարզի «Նաիրի» հայ համայնքի նախագահ Վարդան Թաթոսյանը, տեղական իշխանությունների ներկայացուցիչները, հոգեւորականությունը, ինչպես նաեւ հյուրեր Լվովի, Վոլինի եւ Ժիտոմիրի մարզերի հայ համայնքներից:

Խաչքարի բարձրությունը կազմում է 2,5 մ, այն պատրաստված է հայկական տուֆից:

Հիշեցնենք, որ Ուկրաինայի հայերի միության ղեկավար Վիլեն Շատվորյանի նախաձեռնությամբ 2015-ից երկրի տարբեր շրջաններում բացվել է ավելի քան 20 խաչքար: