Երբ ԵՄ-ն կազատականացնի Հայաստանի հետ վիզային ռեժիմը
Նոյեմբերին նախատեսվում է ստորագրել Հայաստան-ԵՄ նոր համաձայնագիր։ ՀՀ-ում ԳԴՀ արտակարգ եւ լիազոր դեսպան Մաթիաս Քիսլերն ասում է՝ դրանից հետո երկար աշխատանք պետք է կատարվի։ «Փաստաթղթերը պետք է թարգմանվեն ԵՄ բոլոր լեզուներով։ Եթե համաձայնագրի ստորագրումից հետո Հայաստանը կատարի ստանձնած բոլոր պարտավորություները, ապա ԵՄ-ն կանաչ լույս կվառի Հայաստանի համար»։
Դեռ մեկ ամիս առաջ ԵՄ-ն կանաչ լույս վառեց Վրաստանի համար՝ ազատականացնելով վիզային ռեժիմը։ Գլոբալիզացիայի եւ տարածաշրջանային համագործակցության վերլուծական կենտրոնի նախագահ Ստեփան Գրիգորյանը Վրաստանի գործընկերներից հետաքրքրվել է եւ պարզել՝ Վրաստանում 1 ամսվա մեջ ով մեկնել է Եվրոպա, բոլորը վերադարձել են։ «Մոլդովան 1.5 տարի օգտվում է այդ հնարավորությունից, ոչ մի արտառոց դեպք չի եղել»։
Դեսպան Քիսլերը նշում է. «Պետք է հասկանալ, որ Վրաստանը, Ուկրաինան, Մոլդովան եւ Հայաստանը տարբեր երկրներ են, հետեւաբար, մոտեցումները եւս տարբեր են։ Հայաստանի հետ մենք դեռ չեն ազատականացրել վիզային ռեժիմը, սակայն աշխատում ենք այլ ուղղություններով բարելավումներ կատարել։ Օրինակ, մենք ավելացրել ենք երկարաժամկետ վիզաների տրամադրումը։ Հիմա մենք 20 տոկոսով ավելի շատ ենք երկարաժամկետ վիզաներ տրամադրում»։
Ստեփան Գրիգորյանը նշում է՝ մինչեւ վիզաների ազատականացումը, Վրաստանում մերժումները միայն 1 տոկոսի շրջանակներում են եղել։ Բելառուսում եւ Ռուսաստանում, որտեղ ԵՄ-ի հետ վիզաների հեշտացման որեւէ համաձայնագիր չկա, մերժումները եւս կազմում են միայն 1 տոկոս։ Հայաստանը դեռ 2012-ին է ստորագրել վիզաների տրամադրումը դյուրացնելու մասին համաձայնագիրը։ Այդ ժամանակ մերժում էին դիմողների 8 տոկոսին, իսկ 2015-ին մերժել են 12.3 տոկոսին։ «Մերժումների մեծ մասի պատճառն այն է, որ մեր քաղաքացիները թերի են պատրաստում փաստաթղթերը»։
Գերմանիան եւ Ֆրանսիան այն երկրներն են, որոնք ի տարբերությունում ԵՄ անդամ մյուս պետությունների, նվազեցրել են մերժումները. 2012 թ-ի 19,2 տոկոսի համեմատ 2015-ին Գերմանիան մերժել է միայն դիմողների 9.4 տոկոսին։ «Մերժումների ցուցանիշը դեռեւս բարձր է, սակայն մենք այլ ուղղություններով ենք բարելավումներ իրականացրել, գերմանական հյուպատոսությունները սկսել են ավելի լավ աշխատել, նվազեցրել ենք դիմելու եւ պատասխան ստանալու միջեւ ընկած ժամանակահատվածը»,- ասաց Մաթիաս Քիսլերը։
Պաշտոնական վիճակագրության համաձայն, 2016 թ-ի երրորդ եռամսյակում 3 անգամ ավելի շատ Հայաստանի քաղաքացիներ են ԵՄ-ում ապաստան խնդրել, քան 2015 թ-ի նույն ժամանակահատվածում։