Շալանդի Կոսովոն իսկական ճակատամարտ տվեց Անգլիայում

Ֆուտբոլի Եվրոպայի առաջնության ընտրական մրցափուլում A խմբում ընդգրկված Կոսովոյի նորաստեղծ հավաքականը, որը գլխավորում է Հայաստանի հավաքականի նախկին գլխավոր մարզիչ Շալանդը, իսկական ճակատամարտ տվեց Անգլիայում, խփեց երեք գոլ, բայց ի վերջո դաշտի տերերին զիջեց 5:3 հաշվով:

Ի դեպ, մինչ այս խաղը Կոսովոն երկրորդ տեղում էր: Մյուս խաղում չեխերը, որոնք նախորդ խաղում սեփական դաշտում զիջել էին Կոսովոյին, մրցակցի դաշտում 3:0 հաշվով հաղթեցին Չեռնոգորիային:

Հոկտեմբերյան խաղերից առաջ A խմբում չորս խաղից հետո 12 միավորով առաջատարն Անգլիան է, հնգական խաղ անցկացրած Չեխիան եւ Կոսովոն ունեն համապատասխանաբար ինը եւ ութ միավոր:

B խմբում Պորտուգալիան եւ Սերբիան սպասված հաղթանակներ տարան մրցակցի դաշտում: պորտուգալացիները 5:1 հաշվով հաղթեցին լիտվացիներին, իսկ սերբերը՝ 3:1 հաշվով լյուքսեմբուրգցիներին:

Հինգ խաղից հետո Ուկրաինան 13 միավորով խմբի առաջատարն է: Պորտուգալիան չորս խաղից հետո ունի ութ միավոր, իսկ սերբերը մեկ միավոր քիչ ունեն, բայց մեկ խաղ էլ ավելի են խաղացել, քան պորտուգալիան:

H խմբում գերկարեւոր էին հանդիպումները Իսլանդիայի եւ Թուրքիայի համար: Եթե թուրքերը Մոլդովայում 4:0 հաշվով վստահ հաղթանակ տարան տեղի հավաքականի նկատմամբ, ապա վիկինգները Ալբանիայում պարտվեցին 4:2 հաշվով եւ զգալիորեն բարդացրին իրենց գործերը: Ֆրանսիացիները ջենտլմենաբար ընդամենը 3:0 հաշվով հաղթեցին Անդորրային:

Վեց խաղից հետո Թուրքիան եւ Ֆրանսիան ունեն 15-ական, իսկ Իսլանդիան՝ 12 միավոր:

Top-News.am