«Փյունիկը» հաղթեց, իսկ «Ալաշկերտը»՝ պարտվեց

«Ալաշկերտը» կռիվ տվեց ու պայքարեց «Ստյաուայի» հետ, բայց ցավալի պարտություն կրեց 0-3 հաշվով:

Աբրահամ Խաշմանյանի թիմը Եվրոպա լիգայի որակավորման երկրորդ փուլում հանդիպել է ռումինական «Ստյաուային»: Առաջին խաղը կայացավ Երևանում, ՀՖՖ տեխնիկական կենտրոն/ ֆուտբոլի ակադեմիայում:

Խաղի առաջին 45 րոպեից հետո «Ալաշկերտը» ուներ առավելություն:

Հայաստանի գավաթակիրը շատ վստահ տեսք ուներ ու մի քանի անգամ իրական գոլային պահեր ստեղծեց մրցակցի դարպասի մոտ:

Գոլի հեղինակ կարող էին դառնալ Ուրոշ Նենադովիչը և Դանիլո Սեկուլիչը: Մեկ դեպքում գնդակը դիպավ դարպասաձողին, մյուսում՝ հարվածը մի փոքր շեղ ընթացավ:

Երկրորդ կեսում պատկերը փոխվեց: Ռումինական ակումբը 60-րդ րոպեին, օգտվելով Չանչարևիչի անվստահ խաղից, բացեց հաշիվը:

Խաշմանյանի ֆուտբոլիստները փորձեցին փրկել հանդիպումը, սակայն ոչինչ անել չստացվեց: «Ստյաուան» ևս երկու անգամ կարողացավ գոլի հեղինակ դառնալ: Աչքի ընկան Կրիստեան և Կոմանը:

Հավելենք, որ խաղին VIP օթյակից հետևում էր ՀՖՖ նախագահ Արթուր Վանեցյանը:

Հարկ է նշել, որ հանդիպման ընթացքում բավականին ակտիվ էին երկրպագուները: Red Eagles ֆան-ակումբի ներկայացուցիչները նույնպես մարզադաշտում էին ու մինչև խաղի վերջին րոպեն աջակցում էին «Ալաշկերտին»:

Այսպիսով, առաջին խաղում «Ալաշկերտը» պարտվում է 0-3 հաշվով ու պատասխան խաղից առաջ անչափ ծանր վիճակում է:

Ավելի վաղ կայացավ «Փյունիկ»-«Յաբլոնեց» խաղը: «Փյունիկը» առաջին խաղում 2-1 հաշվով հաղթանակ տարավ չեխական «Յաբլոնեցի» նկատմամբ: Լարված հանդիպումից հետո երևանյան թիմի գլխավոր մարզիչ Ալեքսանդր Տարխանովը հանդիպեց լրագրողներին:

Մասնագետը նախ անդրադարձավ խաղին, նշելով, որ և՛ հանդիպումը լավը ստացվեց, և՛ մրցակիցն էր բավականին լավը:

«Խաղը բավականին լավը ստացվեց, «Յաբլոնեցն» էլ լավ թիմ էր, մենք էլ լավ խաղացինք, առաջին խաղակեսում առավելություն ունեինք, գոլեր խփեցինք, էլի մոտ 5 պահ ունեինք, ընդ որում, գրեթե թույլ չէինք տալիս մեր դարպասին մոտենալ: Հետո բաց թողեցինք նախաձեռնությունը, մեզ մոտ մի փոքր թերացավ հենակետային գոտին: Էրիկ Վարդանյանը բավականին լավ խաղաց, շատ էր տեղաշարժվում: Իր դերից մի քիչ լավ գլուխ չհանեց Արտակ Եդիգարյանը: Երբ այդ դիրքում Կառլեն Մկրտչյանն է խաղում, Էրիկի համար ավելի հեշտ է լինում. գնդակի վերահսկողությունը լավ է ստացվում:

Երկրորդ խաղակեսում մեզ չբավականցրեց հենակետային գոտում խաղակցվածությունը: Նաև մի փոքր հոգնածություն էր նկատվում: Եդիգարյանն ընդամենը երկրորդ խաղն է անցկացնում, մարզավիճակը դեռ օպտիմալ չէ: Վերջնամասում խաղն այնպես ընթացավ, որ մենք կարող էինք 2 գոլ խփել, նրանք ևս մոտ էին գոլ խփելուն: Այսպես ասած՝ փոխադարձ պահերով խաղ ստացվեց»:

Հարց հնչեց հերթական անգամ ստանդարտ իրավիճակից գոլ բաց թողնելու մասին:

«Մրցակցի կազմում բարձրահասակ խաղացողներ էին, մեզ մոտ այդ դիրքում Արման Մանուչարյանն է խաղում: Այդ դրվագում պարզապես համագործակցությունը չստացվեց: Մենք գրեթե բոլոր ստանդարտները չեզոքացրինք: Այստեղ միայն մի պահ չստացվեց, կորցրինք կենտրոնացումն ու գոլ բաց թողեցինք»:

Ընդհանուր խաղը Տարխանովը գնահատեց 4 բալով.

«Կարծում եմ՝ 4-ի խաղացինք: Առաջին խաղակեսը շատ լավն էր, երկրորդում թերացանք: Առհասարակ, ես արգելում եմ երկար փոխանցումներով խաղալ: Մարկու Կրիստին երկար փոխանցումների ժամանակ հաճախ կորցնում էր գնդակը: Նրա հետ այդ մասին առանձին կխոսենք:

Հենակետային գոտում Կառլենը բացակայում էր վնասվածքի պատճառով: Այդ դիրքում այսօր Եդիգարյանն էր, որը լիովին պատրաստ չէր հենակետային գոտում խաղալուն: Մյուս խաղում Կառլենը մեզ շատ պետք կլինի»:

Ռուս մասնագետը խոսեց նաև Էրիկ Վարդանյանի խաղի մասին՝ նշելով, որ լավ խաղ անցկացրեց:

«Նա և պաշտպանությանն էր լավ մասնակցում, և գրոհներին. բոլոր գրոհները նրանից էին սկսվում: Այսօր շատ լավ խաղաց»: