Չինաստանում տղամարդը, խանդելով կնոջն իրենց որդու հանդեպ տածած ուշադրության համար, նետվել է շենքի 5-րդ հարկից և ողջ մնացել (տեսանյութ)

Չինաստանում փրկել են տղամարդուն, որը կնոջը խանդելով իրենց մեկամյա որդու հանդեպ տածած ուշադրության համար՝ նետվել է շենքի հինգերորդ հարկից: Այս մասին հայտնում է Daily Mail-ը։

Դեպքը պատահել է հուլիսի 13-ին՝ Չինաստանի Չժեցզյան նահանգի Վենլին ափամերձ քաղաքում: Կինը մեղադրել է ամուսնուն իր բացակայության ընթացքում իրենց որդուն անուշադրության մատնելու համար, որից հետո տղամարդը բարկացել է և նետվել պատուհանից, սակայն վայրէջք է կատարել երրորդ հարկի պատշգամբում և այդպիսով ողջ մնացել: Ընկնելուց հետո նա զանգահարել է իր սիրելիին և զգուշացրել, որ պատրաստվում է խեղդվել մոտակա ջրամբարում:

Վախեցած կինն անմիջապես ոստիկանություն է դիմել, որից հետո տղամարդն անգիտակից վիճակում հայտնաբերվել է ծանծաղ ջրում: Նրան տեղափոխել են հիվանդանոց և անհապաղ բժշկական օգնություն ցուցաբերել: Աղբյուրը հավելում է, որ այս պահին հիվանդի վիճակը կայուն է:

Լրագրողների հետ զրույցում տղամարդը դժգոհել է, որ երեխայի ծնվելուց հետո կինը դադարել է ուշադրություն դարձնել իր վրա:

Կինը, իր հերթին, ոստիկանությանը հայտնել է, որ ամուսինը պատուհանից ցատկել է այն ժամանակ, երբ նստած քննարկել են վերջինիս վարքագիծը: Նա նաև հայտնել է, որ վերջերս նկատել է որդու հանդեպ ամուսնու խանդը:

Աղբյուրի փոխանցմամբ՝ համացանցի օգտատերերը պաշտպանել են մորը և դատապարտել տղամարդու վարքագիծը:

«Երևում է՝ կինը երկու երեխա ունի»,- գրառում է կատարել օգտատերերից մեկը:

«Ինչպիսի մանկամիտ արարք: Եվ ինչպե՞ս կարող է այդ տղամարդը հայր լինել»,- գրել է մեկ այլ օգտատեր:

Բաժանորդագրվեք Top-News.am-ին Telegram-ում