Նախկին նախագահը սպառնացել է հրազեն գործադրել՝ եթե իրեն փորձեն ձերբակալել

Ղրղզստանի նախկին նախագահ Ալմասբեկ Աթամբաեւը հայտարարել է, որ մտադիր չէ ներկայանալ ՆԳ նախարարություն՝ հարցաքննելու, իսկ եթե փորձեն ուժով բերման ենթարկել կամ ձերբակալել, սպառնացել է հրազեն գործադրել։ Այս մասին ըստ ՏԱՍՍ-ի փոխանցման հայտարարել է անձամբ նախկին նախագահ Աթամբաեւը, մեկնաբանելով այն, որ որպես վկա կանչվել է հարցաքննության՝ քննվող քրեական գործի շրջանակներում։ «Ես ոչ մի տեղ էլ չեմ գնա ու չեմ մասնակցի այդ կրկեսին»,- ասել է նա, հավելելով, որ ցանկացած հարցով կարող են դիմել իր փաստաբան Սերգեյ Սլեսարեւին։ Նշենք, որ Ղրղզստանի պառլամենտը քվեարկել է Աթամբաեւին անձեռնմխելիությունից զրկելու օգտին։ Նա կասկածվում է մի շարք կոռուպցիոն եւ այլ հանցադրվագներում, կապված հողամասերի վերապրոֆիլավորման, բանտարկյալներին անօրինաբար ազատ արձակելու եւ այլ աղմկոտ դեպքերի հետ։