Ղրղզստանում նախկին նախագահ Աթամբաևի կողմնակիցները հանրահավաք են անցկացնում

Ղրղզստանի նախկին նախագահ Ալմազբեկ Աթամբաևը ժամանել է իր կողմնակիցների հանրահավաքին, հայտնում է «ՌԻԱ Նովոստի»-ն:

Բիշքեկում այսօր այն շենքի մոտ, որտեղ գտնվում է Աթամբաևի շտաբ-գրասենյակը, սկսվել է նախկին նախագահի կողմնակիցների հանրահավաքը: Ներկա դրությամբ դրան մասնակցում է մոտ 500 մարդ: Հանրահավաքին է միացել նաև նախկին նախագահը:

Պարբերաբար հանրահավաքի կազմակերպիչները կոչ են անում հավաքված մարդկանց չտրվել հնարավոր սադրանքներին:

«Սա խաղաղ հավաք է»,- ասում են նրանք:

Բոլորը սպասում են նախկին նախագահի ելույթին:

Ավելի վաղ Ղրղզստանի խորհրդարանը զրկել էր Աթամբաևին անձեռնմխելիությունից՝ նրան քրեական պատասխանատվության ենթարկելու նպատակով: Աթամբաևին նախկին նախագահի կարգավիճակից, հետևաբար նաև անձեռնմխելիությունից զրկելու որոշմանը կողմ էր քվեարկել 110 պատգամավորից 103-ը:

Ավելի վաղ երկրի խորհրդարանը դատախազությանն էր հանձնել նախկին նախագահի հասցեին արված մի շարք մեղադրանքները, որը պատրաստվել էր հատուկ պատգամավորական հանձնաժողովի կողմից:

Խորհրդարանականների վարկածով՝ Աթամբաևը մեղավոր է Բիշքեկի ջերմաէլեկտրակայանի արդիականացման ժամանակ կոռուպցիայի, հողատարածքների ապօրինի վերափոխման, կեղծ բժշկական փաստաթղթերով քրեական հեղինակություն Ազիզ Բատուկաևին ազատ արձակելու և մի շարք այլ ապօրինի գործողությունների համար:

Գլխավոր դատախազությունը մասամբ հաստատել է հանձնաժողովի ներկայացրած մեղադրանքները, սակայն չի հաստատել, որ Աթամբաևն ուղիղ կապ է ունեցել իշխանության ուզուրպացիայի, լրագրողների ու քաղաքական ընդդիմախոսներին հալածելու հետ:

Աթամբաևն իր հերթին խորհրդարանականների մեղադրանքներն անհեթեթություն է անվանել՝ հայտարարելով, որ իր խիղճը ժողովրդի առաջ մաքուր է, և որ ինքը պատրաստ է պատասխան տալ երկրի նախագահի պաշտոնում եղած ժամանակ արած գործողությունների համար:

Եթե հետաքննությունը հաստատի Աթամբաևի դեմ հնչած մեղադրանքները, և դատարանը նրան մեղավոր ճանաչի, Ղրղզստանի նախկին ղեկավարին կարող է ցմահ բանտարկություն սպառնալ:

Բաժանորդագրվեք Top-News.am-ին Telegram-ում