Ֆրանսիայում գետերը ցամաքում են. Կառավարությունը ցանկանում է ջրի օգտագործումը կրճատել

Ֆրանսիայի կառավարությունը ցանկանում է ջրի օգտագործումը կրճատել՝ խրախուսելով հոսող ջրերի վերաշրջանառությունը, ինչպես նաեւ սպառողներին՝ գործածվող ջրի քանակությունը նվազեցնելու համար, քանի որ կլիմայի փոփոխության պատճառով գետերի հոսքն աստիճանաբար դանդաղում է, փոխանցում է Reuters-ը:

Տեղական իշխանությունների եւ կոմունալ ծառայությունների հետ մի քանի ամիս տեւած քննարկումներից հետո շրջակա միջավայրի նախարարությունը հայտարարել է, որ ցանկանում է ջրի օգտագործումը 10 տոկոսով կրճատել 5 տարվա ընթացքում եւ 25 տոկոսով՝ 15 տարվա ընթացքում:

Նպատակն է Ֆրանսիան առավել չորային ապագային նախապատրաստելը: Հետազոտության համաձայն՝ ֆրանսիական գետերի միջին ծավալը հաջորդ 50 տարում կարող է նվազել 10-40 տոկոսով:

«Շրջակա միջավայրի պահպանման համար մեր պայքարում ջուրը գերակա հարցերից մեկն է»,- լրագրողներին ասել է շրջակա միջավայրի նախարար Ֆրանսուա դե Ռյուգին:

Ջրի գործածումը նվազեցնելու համար կառավարությունը կարող է ջրի ավելի բարձր գներ սահմանել խոշոր սպառողների համար, ինչպիսին են ջրավազանով խոշոր տնային տնտեսությունները, սակայն սակագների սահմանումը վերապահել է տեղական իշխանություններին: Ֆրանսիայում միջին մարդը օրական գործածում է մոտ 150 լիտր ջուր:

Կառավարությունը նաեւ նախատեսում է 2022 թվականից խստացնել որոշակի ճյուղերի համար ջրօգտագործման պահանջները, ինչպիսին է շինարարական ճյուղը:

Կառավարությունը նաեւ ցանկանում է 2025 թվականին եռապատկել անձրեւաջրերի եւ հոսող ջրերի օգտագործումը բույսերը ջրելու, զուգարանների եւ այլ նպատակների համար, որոնք խմելու ջրի ստանդարտներ չեն պահանջում:

Ֆրանսիայում վերաշրջանառվում է հոսող ջրերի միայն մոտ 1 տոկոսը, մինչդեռ Իսպանիայում եւ Իտալիայում՝ 10 տոկոսը: