Իտալիա-Հայաստան հանդիպումն անավարտ է մնացել. Հայաստանի հավաքականը հեռացել է խաղադաշտից

Ֆուտզալի Իտալիայի և Հայաստանի հավաքականների միջև ընկերական երկրորդ հանդիպումն անավարտ է մնացել. իտալացիները չեն պահպանել արդար խաղի (fair play) կանոնները: Այս մասին ՀՖՖ պաշտոնական կայքին Իտալիայից հայտնել են ՀՖՖ պատվիրակության ներկայացուցիչները:

Հունիսի 18-ին Հայաստանի հավաքականը հաղթել էր իտալացիներին 2:1 հաշվով, և դաշտի տերերը երկրորդ խաղում տրամադրված էին անպայման վրեժխնդիր լինել: Մրցավարն իտալացի էր և ցանկացած կասկածելի իրավիճակում որոշում է կայացրել հօգուտ իտալացիների՝ նշանակելով չհիմնավորված բազմաթիվ տուգանայիններ:

Այդուհանդերձ, հավասար պայքար է ընթացել: 2:2 հաշվի ժամանակ, երբ խաղի ավարտին մնացել է 1 րոպե 12 վայրկյան, մրցավարը ոչ կոնտակտային իրավիճակում հերթական տուգանայինն է ֆիքսել՝ խաղի ընթացքում երրորդ անգամ անարդարացիորեն 10-մետրանոց նշանակելով մեր դարպասին:

Քանի որ իրականում խախտում չի եղել, մեր թիմի ֆուտբոլիստները հայտնել են իրենց անհամաձայնությունը. հավաքականի մարզիչները հրահանգել են դարպասապահին ազատել դարպասը՝ ի նշան բողոքի: Իտալացիները հավաստիացրել են, որ իրենք էլ են համարում, որ խախտում չի եղել, և իրենք պատրաստ են շեղ հարվածել, եթե դարպասապահն զբաղեցնի իր տեղը՝ այդպիսով պահպանելով արդար խաղի կանոնները:

Այդուհանդերձ, երբ մեր դարպասապահը զբաղեցրել է իր տեղը, իտալացիները գրավել են դարպասը: Դրանից հետո Հայաստանի հավաքականի մարզիչներն ու ՀՖՖ պատվիրակությունը որոշել են դուրս բերել թիմը խաղադաշտից, քանի որ իտալացիները, ի հակառակ իրենց խոստումի, չեն պահպանել արդար խաղի կանոնները: Խաղը չի շարունակվել: