Լոնդոնում 200 մ բարձրությամբ երկնաքերի տանիքին ամբողջությամբ թափանցիկ պատերով ու հատակով և 360° տեսարան «ապահովող» լողավազան կբացվի (լուսանկարներ)

Մեծ Բրիտանիայի մայրաքաղաք Լոնդոնի կենտրոնում 200 մետր բարձրությամբ 55-հարկանի երկնաքերի տանիքին ամբողջությամբ թափանցիկ պատերով ու հատակով լողավազան կբացվի, որից 360° տեսարան կբացվի Լոնդոնի վրա։

Ինչպես նշում է Daily Mail-ը, Infinity London կոչվող երկնաքերի ու լողավազանի նախագծողը Compass Pools ընկերությունն է։

Լողավազանի տարողունակությունը 600 000 լիտր է։ Այն շրջափակված է ակրիլե թափանցիկ կողապատերով և թափանցիկ հատակ ունի, որը թույլ կտա ներքևում գտնվող մարդկանց տեսնել վերևում գտնվողներին։

Լողորդները լողավազան մուտք կգործեն սուզանավի դռնից սկիզբ առնող պտուտակաձև սանդուղքով։ Լողավազանի ջեռուցման համակարգի համար կօգտագործվի երկնաքերի օդորակիչների համակարգի թափոնային էներգիան։

Infinity London երկնաքերի կառուցումը, որի տանիքին կգործի լողավազանը, կարող է սկսվել արդեն հաջորդ տարի։ Կառուցման մեկնարկի համար անհրաժեշտ է, որ բոլոր կողմերը ստորագրեն համապատասխան պայմանագիրը։