Սառը հանդիպում Պորտսմուտում. Թրամփը Մերկելի հետ աշակերտուհու պես է վարվել

Նորմանդիայում դաշնակիցների ափհանման 75-ամյակի առիթով Բրիտանիան կազմակերպում է մեծ զինվորական տոն։ Այնտեղ մի քանի ամսվա ընթացքում առաջին անգամ հանդիպել են Գերմանիայի կանցլեր Անգելա Մերկելը եւ ԱՄՆ նախագահ Դոնալդ Թրամփը։ Հանդիպումը սառն էր, գրում է Gazeta-ն՝ հղում կատարելով Focus-ին։

Նշվում է, որ կես տարվա մեջ առաջին ոչ երկար հանդիպման ժամանակ խոսքը վերաբերել է Եվրախորհրդարանի ընտրություններին, Հյուսիսային Աֆրիկայում եւ Սախել տարածաշրջանում ահաբեկչության դեմ պայքարին եւ Լիբիայի իրավիճակին։ Մինչեւ վերջ հստակություն չի եղել այն հարցում, թե արդյոք Պորտսմուտում տեղի կունենա առաջնորդների հանդիպումը։ Պետությունների ղեկավարների հարաբերությունները վաղուց արդեն լավ չեն. Մերկելը քանիցս քննադատել է Թրամփի հովանավորչության ազգայնական քաղաքականությունը եւ բազմաթիվ կոնֆլիկտային իրավիճակների լուծումից խուսափելը։

Պորտսմուտի հանդիպման լուսանկարներում կարելի է տեսնել նրանց սառը ողջույնը։ Մերկելը եւ Թրամփը միմյանց ձեռք չեն սեղմել եւ լուսանկարիչներին հնարավորություն չեն տվել խոսակցությունն սկսելուց առաջ համատեղ լուսանկար անել։ Գերմանական կողմի տվյալներով՝ ղեկավարները շփվել են մոտ 20 րոպե, Սպիտակ տունը տեղեկացրել է 10 րոպեի մասին։

Տեսանյութի ուղեկից նյութում նշվում է, որ հանդիպման սկզբում Թրամփը խուսափում է Մերկելի հետ ցանկացած շփումից, իսկ Մերկելը նրա կողքին կանգնած է «աշակերտուհու» նման, որը սկզբում ուզում է նստել, դանդաղում է, քայլ անում դեպի Թրամփն ու նորից հապաղում։ Այդ ժամանակ Թրամփն անտեսում է նրան «դիվանագիտական արվեստի բոլոր կանոններով»։ Ղեկավարների հարաբերությունները խիստ լարված են թվում։