Զելենսկին ասել է՝ ինչու է որոշել Սաակաշվիլիին վերադարձնել ուկրաինական անձնագիրը (տեսանյութ)

Ուկրաինայի նախագահ Վլադիմիր Զելենսկին հայտնել է, որ ուկրաինական քաղաքացիությունը վերադարձրել է Վրաստանի նախկին նախագահ, Ուկրաինայի Օդեսա նահանգի նախկին նահանգապետ Միխեիլ Սաակաշվիլիին «արդարությունը վերականգնելու համար»: Այդ մասին Ուկրաինայի նորընտիր նախագահն ասել է «Завтрак с 1+1» հեռուստածրագրին տված հարցազրույցում:

«Քաղաքական պլաններ չկան: Ես խոստացել էի մամուլին: Ես ասել էի՝ «Կարծում եմ՝ նրա անձնագիրն ապօրինի են վերցրել», այդ իսկ պատճառով ես այն վերադարձրի: Այսքանը»,-ասել է Զելենսկին:

Հարցին՝ հանդիպել է արդյոք Սաակաշվիլիի հետ, Զելենսկին պատասխանել է. «Նա ինձ գրել է, տեսանյութ էր ձայնագրել: Այն հավանաբար տեսել եք սոցցանցերում: Շնորհակալություն էր հայտնում: Չարժե, ես էլ ձեզ եմ շնորհակալ»:

«Ինչի՞ համար շնորհակալություն: Ես պարզապես անում եմ իմ աշխատանքն ու իրականացնում իմ խոստումները: Ես շատ քիչ խոստումներ եմ տվել, սակայն ցանկանում եմ իրականացնել դրանք»,- հավելել է նախագահը:

Տեսանյութում այդ հատվածը կարող եք դիտել 14.40 րոպեից.