Սա սկանդալ է. բրիտանացի պատգամավորն անդրադարձել է Հենրիխ Մխիթարյանին (տեսանյութ)

Մեծ Բրիտանիայի խորհրդարանի պատգամավոր, Լեյբորիստական կուսակցության փոխղեկավար Թոմ Ուոթսոնը, ելույթ ունենալով խորհրդարանում, անդրադարձել է Հայաստանի ազգային հավաքականի և «Արսենալի» կիսապաշտպան Հենրիխ Մխիթարյանի շուրջ ստեղծված իրավիճակին՝ Եվրոպայի լիգայի եզրափակչին նրա չմասնակցելը սկանդալ անվանելով:

«ՈւԵՖԱ-ի քաղաքականությունն ասում է. «Յուրաքանչյուր ոք իրավունք ունի վայելելու ֆուտբոլը՝ անկախ նրանից, թե ով ես, որտեղից ես և թե ինչպես ես խաղում»: Սակայն հաջորդ շաբաթ Հենրիխ Մխիթարյանը բաց կթողնի նման կարևոր խաղ այն պատճառով, որ նա Հայաստանից է: Եվ «Արսենալի» երկրպագուները, որոնք հայկական անուններ ունեն, նույնպես մուտքի արտոնագիր չեն ստանա Բաքու մեկնելու համար: Սա սկանդալ է, գեղեցիկ խաղի տգեղ կողմն է և բոլորովին անընդունելի է», - ասել է Ուոթսոնը:

Վերջինս հարցադրում է արել նաև, թե արդյոք ԱԳ նախարարը կպահանջի ՈւԵՖԱ-ից հաստատել, որ մի երկիր, որը ստիպում է խաղացողին ընտրել սպորտի և անվտանգության միջև և արգելում է երկրպագուներին ներկա գտնվել խաղին, այլևս իրավունք չի ունենա ապագայում նման միջոցառումներ հյուրընկալել:

Պատգամավորի ելույթը միաձայն հավանության է արժանացել իր գործընկերների շրջանում: