Նապոլեոնի սիրային նամակները աճուրդում վաճառվել են 510 հազար եվրոյով

Ֆրանսիայում աճուրդի ժամանակ Նապոլեոն Բոնապարտի երեք սիրային նամակները, որոնք նա ուղարկել էր իր կնոջը՝ Ժոզեֆինային, վաճառվել են ավելի քան 510 հազար եվրոյով, հաղորդում է «ՌԻԱ Նովոստին»՝ վկայակոչելով Drouot աճուրդի տանը:

Ամենաթանկը եղել է այն նամակը, որն ապագա կայսրը գրել է 1796 թվականին իր իտալական արշավի ժամանակ: Սակարկությունների մասնակիցներից մեկն այն գնել է 221 հազար եվրոյով:

«Սերը հաղթում է», - Twitter-ում գրել են աճուրդի կազմակերպիչները:

Նապոլեոնի նամակները, ինչպես եւ սակարկությունների այլ առարկաները, ներառվում է Aristophil ընկերության հավաքածուում, որը 2015-ին հայտնել էր սնանկացման մասին:

Սնանկացած ընկերությանը պատկանող ձեռագրերի հսկայական ժողովածուն աճուրդներում կվաճառվի 6 տարիների ընթացքում: