Գուտերիշը զգուշացրել է մուսուլմանների հանդեպ աճող ատելության մասին

ՄԱԿ գլխավոր քարտուղար Անտոնիո Գուտերիշը նախազգուշացրել է մուսուլմանների հանդեպ աճող ատելության մասին Նոր Զելանդիայի մզկիթների ահաբեկչությունից մեկ ամիս չանցած, երբ զոհվեց մոտ 50 մարդ։ Այս մասին նա ասել է Ալ Ազհարում՝ աշխարհի սուննիադավան մուսուլմանների գլխավոր կրոնական հաստատությունում իր ելույթի ժամանակ, որտեղ նա հանդիպել է մեծ իմամ Ահմեդ ալ Թայեբի հետ, տեղեկացնում է AFP-ն։

«Ամբողջ աշխարհում մենք տեսնում ենք աճող ատելություն մուսուլմանների հանդեպ, հակասեմականություն, ռասիզմ եւ այլատյացություն»,- ասել է ՄԱԿ գլխավոր քարտուղարը։ Գուտերիշը նախազգուշացրել է ատելության արտահայտությունների բռնկման մասին, որոնք, ըստ նրա, «դառնում են մեյնսթրիմ, սոցիալական ցանցերում տարածվում անտառային հրդեհների նման»։ «Մենք տեսնում ենք դրանց տարածումը լիբերալ դեմոկրատիաներում, ինչպես նաեւ ավտորիտար պետություններում»։

Գուտերիշը այցով գտնվում է Եգիպտոսում։ Ալ Ազհար այցելությունից հետո նա պետք է հանդիպեր նախագահ Աբդել Ֆաթահ աս Սիսիի հետ։

Հիշեցնենք, որ մարտի 14-ին Քրայսթչերչի երկու մզկիթներում հրաձգության հետեւանքով զոհվել է 50 մարդ, մոտ 30-ը՝ վիրավորվել։ Հրաձիգը սպանդի ուղիղ հեռարձակում է վարել սոցցանցերում։ «Մանիֆեստում» նա իր գործողությունները բացատրել է միգրանտների եւ մուսուլմանների դեմ ատելությամբ»։