Տիմոշենկոն հրաժարվել է նախագահական ընտրությունների երկրորդ փուլում Զելենսկիին կամ Պորոշենկոյին աջակցելուց

Ուկրաինական «Հայրենիք» կուսակցության առաջնորդ Յուլյա Տիմոշենկոն, որը երկրի նախագահական ընտրությունների առաջին փուլում երրորդ տեղն է զբաղեցրել, հայտարարել է, որ հաջորդ փուլ անցած թեկնածուներից ոչ ոքի չի աջակցի, գրում է meduza.io-ն:

«Կարծում եմ, որ ընտրությունների երկրորդ փուլ անցած թեկնածուներից ոչ մեկը չի կարողանա լուծել առկա մարտահրավերները և չի դադարեցնի ո՛չ պատերազմը, ո՛չ աղքատությունը, հետևաբար ես այժմ չեմ կարող որևէ խորհուրդ տալու պատասխանատվություն վերցնել ինձ վրա»,- ասել է քաղաքական գործիչը:

Հիշեցնենք, որ Ուկրաինայում նախագահական ընտրությունները կայացել են մարտի 31-ին:

Ներկա դրությամբ Կենտրոնական ընտրական հանձնաժողովը հրապարակել է քվեների 99%-ի հաշվարկի արդյունքները: Շոումեն և հումորիստ Վլադիմիր Զելենսկին հավաքել է ձայների 30,23%-ը, երկրի գորոծող նախագահ Պյոտր Պորոշենկոն՝ 15,92%-ը, մինչդեռ Տիմոշենկոն ստացել է հաշվարկված քվեների 13,39%-ը: Ընտրությունների երկրորդ փուլը կկայանա ապրիլի 21-ին: