Լոս Անջելեսում աճուրդով վաճառվել է Էյնշտեյնի՝ Հիտլերի «խելագարության» մասին նամակը

20-րդ դարի մեծագույն ֆիզիկոս և տեսաբան Ալբերտ Էյնշտեյնի նամակը, որում նա պատմում է Ադոլֆ Հիտլերի «խելագարության» մասին, վաճառվել է աճուրդով, հաղորդում է CNN-ը: Գնորդը նամակի դիմաց 134 հազար դոլար է վճարել:

Նամակում գիտնականը նշում է, որ Գերմանիայի ֆյուրերի «խելագարությունն» ամբողջովին կործանել է նրան շրջապատող բոլոր մարդկանց կյանքը:

Աճուրդի ժամանակ ներկայացվել են Էյնշտեյնի՝ 1921-1939 թթ. գրված այլ նամակներ, որոնցում նա պատմում է Հիտլերի իշխանության գալու, ինչպես նաև հրեաների դիմադրության մասին:

Նամակներից մեկն ուղղված է Նյու Յորքի Կոլումբիայի համալսարանի ճառագայթային օնկոլոգիայի դասախոս, բժիշկ Մորիս Լենցին: Դրանում Էյնշտեյնը շնորհավորում է նրա՝ Երկրորդ աշխարհամարտի տարիներին հրեա փախստականներին օգուտ բերած գործունեության համար:

«Դիմադրության ուժը, որը թույլ է տվել հրեա ժողովրդին ողջ մնալ հազարամյակներ շարունակ, մեծ մասամբ հիմնված է միմյանց օգնելու ավանդույթի վրա»,- իր նամակում գրում է գիտնականը:

Աճուրդի հանված մեկ այլ նամակ ուղղված է ֆիզիկոսի քրոջը՝ Մայա Վինտելեր-Էյնշտեյնին և վերաբերում է Գերմանիայում նացիստների թափ հավաքող ազդեցությանը:

Ընդհանուր առմամբ ԱՄՆ Լոս Անջելես քաղաքում կայացած աճուրդի ճամանակ վաճառվել է մեծ գիտնականի կողմից գրված 8 նամակ:

Հայտնի է, որ Գերմանիայում ծնված ազգությամբ հրեա Էյնշտեյնը եվրոպաբնակ հրեաներին փրկելու փորձեր է արել, սակայն 1933թ.-ին Ադոլֆ Հիտլերի իշխանության գալուց հետո հրաժարվել է Գերմանիայի քաղաքացիությունից և մեկնել Միացյալ Նահանգներ: