«Աստղային պատերազմների» համար ոգեշնչման աղբյուր դարձած «գլխիվայր» կառուցված հյուրանոցը քանդման վտանգի առջև է կանգնել
«Աստղային պատերազմներ» ֆիլմի առաջին մասերի նկարահանումների մեծ մասն անցկացվել է Թունիսում, և տարածված ավանդազրույցի համաձայն՝ տեղի տեսարժան վայրերից մեկը մեծ ներգործություն է ունեցել ֆիլմի ստեղծող Ջորջ Լուկասի վրա:
Ինչպես գրում է CNN-ը, ռեժիսորի վրա մեծ տպավորություն է գործել Hotel du Lac հյուրանոցը, որը կառուցված է գլխիվայր կանգնած բուրգի տեսքով, որը կարելի է նկատել հետագայում ֆիլմում հայտնված Sandcrawler թրթուրավոր մեքենայում:
Այժմ իտալացի ճարտարապետ Ռաֆաելե Կոնտիջիանիի նախագծած հյուրանոցը, որը 416 համար ունի, չի գործում: 1973-ին բացված և փառահեղ պատմություն ունեցող հյուրանոցը փակվել է 2000 թվականին: Այդ օրվանից այն դատարկ է և 2011-ին վաճառվել է լիբիական կառավարական հիմնադրամին: Այն վերաբացելու մասին ծրագրերն անկատար է մնացել և այժմ այն նախատեսում են քանդել:
Թունիսում խնդրագիր են կազմել այն չքանդելու կոչով, որին ի պատասխան` քաղաքի իշխանությունները նշել են, որ իրենք այն քանդելու թույլտվության խնդրանքով դիմում չեն ստացել: