Ոչ պարտադիր պարտություն Սարաեւոյում

Սարաեւոյում ֆուտբոլի Հայաստանի հավաքականը Եվրոպայի առաջնության ընտրական փուլի առաջին խաղում 2:1 հաշվով պարտվեց Բոսնի եւ Հերցեգովինայի հավաքականից:

Սա այն դեպքերից է, երբ վստահաբար կարող ենք պնդել, որ Հայաստանի հավաքականը կարող էր եւ չպարտվել: Ընդ որում, ոչ թե այն պատճառով, որ մեր հավաքականը լավ էր խաղում, այլ այն, որ մրցակիցն առանձնապես չէր փայլում:

Առաջին գոլը բաց թողեցինք անկյունայինի խաղարկումից հետո: Երկրորդ գոլը մեր հավաքականը ինքը բերեց իր դարպասը, երբ դրանից մի րոպե առաջ դարպասապահ Արամ հայրապետյանը փրկեց հավաքականը գոլից:

Ի դեպ, բոսնիացիների երկրորդ գոլից առաջ, երբ Ղազարյանի եւ Կարապետյանի փոխարեն խաղադաշտ մտան Բաբայանն ու Բրիասկոն, մեր թիմի խաղն աշխուժացավ եւ առնվազն երկու գոլ խփելու հնարավորություն ունեինք:

Հայաստանի հավաքականը միակ գոլը խփեց խաղի ամենավերջում, երբ ձեռքով խաղի համար մրցավարը 11 մետրոնոց նշանակեց, որն իրացրեց Մխիթարյանը:

Մեր թիմի թույլ օղակը հենակետայիններն էին՝ Մկրտչյանը եւ Գրիգորյանը, որոնք դանդաղեցնում էին խաղը եւ գրոհները ճիշտ չէին կարողանում սկսել:

Անպայման պետք է հիշատակել դարպասապահ Արամ Հայրապետյանի վստահ խաղը, որը մի քանի անգամ հավաքականին փրկեց գոլից:

Մնում է հետեւություններ անել եւ փորձել երեք օր հետո հաղթել Ֆինլ;անդիային, որոնք այս տուրում մրցակցի դաշտում պարտվեցին իտալացիներից:

J խմբի մյուս խաղում հույները մրցակցի դաշտում 2:0 հաշվով հաղթեցին Լիխտենշտեյնին:

D խմբում վրացիները Թբիլիսիում 2:0 հաշվով պարտվեցին շվեյցարացիներից, իսկ Ջիբրալթարը 1:0 հաշվով պարտվեց Իռլանդիային: Խաղից ազատ էր Դանիայի հավաքականը:

F խմբում բոլոր խաղերն ավարտվեցին 2:1 հաշվով: Մալթան հաղթեց Ֆարերներին, Շվեդիան՝ Ռումինիային, իսկ Իսպանիան՝ Նորվեգիային:

Top-News.am