Մխիթարյան. Այս կյանքն առանց դժվարությունների ոչ մեկին պետք չէ

Ֆուտբոլի ակադեմիայում կայացել է Հայաստանի 2016 թվականի լավագույն ֆուտբոլիստի և մարզչի պարգևատրման արարողությունը: Լավագույն ֆուտբոլիստի մրցանակը 6-րդ անգամ ստացած Հենրիխ Մխիթարյանը պատասխանել է լրագրողների հարցերին.

- Ինչո՞վ է բացառիկ այս մրցանակը Ձեզ համար:

- Ճիշտն ասած՝ ոչ մի բանով բացառիկ չէր: Ուրախ եմ, որ կրկին դարձել եմ Հայաստանի լավագույն ֆուտբոլիստ: Այս մրցանակը հետագայում ինձ ուժ կտա և կփորձեմ առավելագույնն անել, որպեսզի նորից արժանանամ այս մրցանակին:

- Որպես ազգային հավաքականի ավագ՝ ի՞նչ կասեք հավաքականում մթնոլորտի մասին, ինչպե՞ս են տղաները տրամադրված:

- Բոլորը շատ լավ են տրամադրված, բոլորս էլ գիտենք այս խաղի արժեքը: Լավ ենք պատրաստվում, որպեսզի լավ հանդես գանք և իհարկե խաղալ հաղթանակի համար:

- Երկրպագուների սպասելիքները մեծացել են. ճնշում չեք զգո՞ւմ:

- Երկրպագուների սպասելիքները միշտ մեծ են: Բոլորն էլ հաղթանակ են սպասում: Նախորդ խաղը տպավորիչ ստացվեց և բնական է, որ այս անգամ էլ պետք է խաղանք հաղթանակի համար:

- Ինչպիսի՞ն է Ձեր մարզավիճակը: Նախորդ խաղից հետո Մոուրինյուն այսպիսի արտահայտություն արեց. «կորցրել էինք Հենրիխ Մխիթարյանին»:

- Չեմ կարող ասել, որ կորցրել էին: Փոքր վնասվածք ունեի՝ չնայած պահեստայինների թվում էի: Փառք Աստծու, հիմա ամեն ինչ կարգին է:

- Մրցակցություն գրեթե չկա. տեսնո՞ւմ եք երիտասարդների, ովքեր գալիս են Ձեր հետևից:

- Չէ, մրցակցություն միշտ կա: Կարևոր չէ, թե որ անգամ եմ դառնում լավագույն ֆուտբոլիստ: Բոլոր թիմակիցներս իմ ընկերներն են: Ոչ թե խաղում եմ Հայաստանի լավագույն ֆուտբոլիստ դառնալու համար, այլ ինձ համար, իմ ազգի համար: Ուզում եմ Հայաստանը բարձր պահել աշխարհում, բոլորը իմանան մեր երկրի մասին: Ես միշտ էլ ասել եմ, որ լավագույն ֆուտբոլիստ դառնալը շատ կարևոր է, սակայն առաջնային չէ: Շարժվում եմ դեպի առաջ:

Շատ չեմ հետևում Հայաստանի առաջնության խաղերին: Եթե լինեն տաղանդավոր խաղացողներ, շատ ուրախ կլինեմ, որպեսզի փոխարինեն մեր սերնդին:

- Գաղտնիք չէ, որ դարձել եք «Մանչեսթեր Յունայթեդի» կարևորագույն ֆուտբոլիստներից մեկը ու գաղտնիք չէ, որ դժվար կերպով եք հասել դրան. մի քանի բառով Ձեր մեկնաբանությունը:

- : Բոլորը պետք է կարողանան անցնել դժվարությունների միջով: Նույնը ես: Հեշտ տարա դժվարությունները, քանի որ ուշ թե շուտ իմ հնարավորությունը ստանալու էի: Վերջում ստացա արդյունքը: Փորձում եմ օգնել թիմին:

- Համաշխարհային մամուլի ուշադրության կենտրոնում եք, «դեսպան» ես: Արդյո՞ք դա քեզ լարվածության մեջ չի պահում:

- Դրան ուշադրություն չեմ դարձնում, իմ խաղին եմ ուշադրություն դարձնում: Ցանկանում եմ հնարավորինս անել լավ հանդես գալու համար: Ցույց տալ, թե ինչ է նշանակում լինել հայ:

- Ինչպիսի՞ մրցակից է Ղազախստանի հավաքականը:

- Բոլոր մրցակիցներն էլ ուժեղ են մեզ համար, երբեք հեշտ մրցակիցներ չեն լինում: Պետք է տեսնենք, թե ինչպես ենք ուսումնասիրել և որքանով ենք պատրաստ: Մրցակցի խաղը դեռ ուսումնասիրում ենք, դեռ ժամանակ կա: Մարզիչն ամեն ինչ կներկայացնի և կօգնի մեզ: