Netflix-ը «Հարյուր տարվա մենություն» վեպի հիման վրա սերիալ կնկարահանի

Ամերիկյան Netflix ընկերությունը ձեռք է բերել կոլումբացի հայտնի գրող, Նոբելյան մրցանակի դափնեկիր Գաբրիել Գարսիա Մարկեսի «Հարյուր տարվա մենություն» վեպի հեղինակային իրավունքները, հաղորդում է CNN-ը:

Գրքի հիման վրա իսպանալեզու սերիալ կնկարահանվի: Նախագծի գործադիր պրոդյուսերները կլինեն Մարկեսի տղաները: Հեռուստասերիալի ցուցադրութունը կսկսվի 2020թ.-ին: Այլ մանրամասներ չեն հրապարակվում:

«Հարյուր տարվա մենություն» վեպն առաջին անգամ լույս է տեսել 1967թ.-ին և երբեք չի էկրանավորվել: Հեղինակը տարբեր ֆիլմարտադրողների կողմից բազմիցս նման առաջարկներ է ստացել, սակայն երբեք չի համաձայնել էկրանավորելու նպատակով վաճառել իր վեպերի հեղինակային իրավունքները՝ բացառությամբ «Սերը խոլերայի օրերին» վեպի, որի էկրանավորման ժամանակ՝ 2007թ.-ին, Մարկեսի մոտ արդեն քաղցկեղ էր ախտորոշվել, և գրողը մտահոգված էր իր ընտանիքի հետագա ճակատագրով: