«Մեզ թիկունքից հարված են հասցնում». Երթն ավարտվեց Ազատության հրապարակում
«Երիտասարդներն անկոտրում են, չեն վախենում ոստիկանական հետապնդումներից»։ Այդ մասին Հանրապետության հրապարակում երթի ընթացքում հայտարարել է ակտիվիստ Շահեն Հարությունյանը:
Այսօրվա երթն՝ ի հիշատակ «Հաց բերողի»՝ Արթուր Սարգսյանի, անցել է համեմատաբար ավելի խաղաղ, թեեւ Աբովյան Սայաթ Նովա խաչմերուկում քաշքշուկ է եղել ոստիկանների հետ: Ակտիվիստները փակել էին երթեւեկելի հատվածը եւ նստոտել գետնին: Ոստիկանները՝ Երեւանի փոխոստիկանապետ Վալերի Օսիպյանի գլխավորությամբ, ուժով հեռացրել են ակտիվիստներին երթեւեկելի մասից: Երթի մասնակիցներին բերման չեն ենթարկել, գրկել եւ տեղափոխել են մի քանի մետր հեռու՝ բացելու երթեւեկությունը:
Դրանից հետո երթը անցել է առանց լուրջ միջադեպերի, Հանրապետության հրապարակում՝ կառավարության շենքի առջեւ երթի մասնակիցները կանգ են առել, վարկարկել իրենց կոչերն ու պահանջները: «Երիտասարդներն անկոտրում են, չեն վախենում ոստիկանական հետապնդումներից»,- հայտարարել է Շահեն Հարությունյանը:
«Մեզ թիկունքից հարված են հասցնում»,- ասել է Շահեն Հարությունյանը՝ անդրադառնալով Արթուր Սարգսյանի հուղարկավորության հանրային հանձնախմբին: Նրա խոսքով, մինչեւ վերջին պահը իրենց հստակ ասում են, վերջին պահին՝ ասում են, մենք չենք ուզում Արթուրին հուղարկավորենք «Եռաբլուրում»: «Նույն Արթուրի կողքին կանգնած մարդիկ հրաժարվեցին այն մտքից, որ հուղարկավորվի «Եռաբլուրում»: Թամար Հովհաննիսյանի ելույթից հետո իմ աչքերով տեսա, թե որքան մարդիկ հուսահատվեցին եւ հեռացան»,- ասել է Շահեն Հարությունյանը:
Երթի մասնակիցները այնուհետ վերադարձել են Ազատության հրապարակ:
Վաղը՝ մարտի 21-ին, Ազատության հրապարակից երթ չի լինելու, այլ մոմավառություն եւ քայլերթ է լինելու մարզահամերգային համալիրից մինչեւ Շահումյանի գերեզմանատան սգո սրահ, որտեղ կայանալու է Արթուր Սարգսյանի հուղարկավորությունը:
Հիշեցնենք, որ «Սասնա ծռերին» օժանդակելու մեջ մեղադրվող Արթուր Սարգսյանը՝ «Հաց բերողը», մարտի 16-ին մահացել էր «Արմենիա» բժշկական կենտրոնում:
Արթուր Սարգսյանը 2016 թվականի ամռանը ոստիկանության Երեւանի ՊՊԾ գնդի տարածքը գրավելու օրերին կրակահերթերի տակ ավտոմեքենայով ճեղքել էր ոստիկանական պատն ու սնունդ տարել «Սասնա ծռեր» զինված խմբին։
«Հաց բերող» Արթուր Սարգսյանի հոգեհանգիստը տեղի կունենա երեքշաբթի, մարտի 21-ին, ժամը 18-ին Շահումյանի գերեզմանատանը հարակից «Սան Լազար» սգո սրահում (Լուկաշին 152), իսկ հուղարկավորությունը՝ մարտի 22-ին, ժամը 14-ին, նույն սրահից։