Հայաստանի համար գազի ավելի էժան սակագին սահմանել հնարավոր չէ. «Գազպրոմ Արմենիա»-ի գլխավոր տնօրեն
Հայաստանում հնարավոր չէ գազի ավելի ցածր սակագին ունենալ: Այս մասին, «Հ1» եւ «Արմենիա» հեռուստաընկերությունների խնդրանքով մեկնաբանելով գազի ավելի էժան սակագին ունենալու հնարավորության վերաբերյալ քաղաքական որոշ գործիչների հայտարարությունները՝ նշել է «Գազպրոմ Արմենիա» ՓԲԸ վարչության նախագահ, գլխավոր տնօրեն Հրանտ Թադեւոսյանը՝ հավելելով. «Այն, ինչ ունենք այսօր, ամենաօպտիմալ եւ լավագույն տարբերակն է»:
Հրանտ Թադեւոսյանի խոսքով, «Գազպրոմ Արմենիան» սահմանին 10.000 խմ բնական գազի համար վճարում է 150 դոլար՝ առանց ավելացված արժեքի հարկի: Սպառողին այն հասնում է միջինը 255 դոլարով՝ ներառյալ ԱԱՀ-ն: Դրան էլ գումարվում են դոլար-դրամ տատանումները եւ տարբերությունը կազմում է 60 դոլարին համարժեք դրամ:
Թադեւոսյանը նշել է, որ այդ 60-ական դոլարները ծախսվում են 1600 կմ գազափոխադրման համակարգի մայրուղային գազատարների եւ 14000 կիլոմետր բաշխման ցանցի շահագործման եւ պահպանման վրա, ինչպես նաեւ այդ միջոցներով վճարվում են աշխատակիցների աշխատավարձերը, հաշվարկվում է բնական գազի անխուսափելի կորուստներն ու ներդրումների համար անհրաժեշտ ծախսերը:
Ընկերության տնօրենին զարմացնում է այն, որ որոշ քաղաքական ուժեր պնդում են, թե կարելի է հրաժարվել ռուսական գազից եւ այլ երկրներից այն գնել, օրինակ, 200 դոլարով, իսկ սպառողին վաճառել՝ 230-240 դոլարով:
Թադեւոսյանի խոսքով, դրանց դեռ պետք է գումարել ավելացված արժեքի հարկը. «240 դոլարի 20 տոկոսը եթե հաշվարկենք, միջին գինը 290 դոլար է ստացվում: Մինչդեռ «Գազպրոմ Արմենիա»-ի սահմանած գինը կազմում է 255.1»-,-ինչն էլ, ընկերության տնօրենի գնահատմամբ, հնարավոր ամենաօպտիմալ տարբերակն է: Թադեւոսյանը նաեւ նկատել է, որ 40 դոլար տարբերությունը բավարար չէ անվտանգ եւ հուսալի շահագործում իրականացնելու համար: