Էրդողանի փեսան նույնպես անհանդուրժող է ընդդիմադիրների նկատմամ

Թուրքիայի էներգետիկայի ու բնական ռեսուրսների նախարար Բերատ Ալբայրակը նույնքան անհանդուրժող է քննադատների հանդեպ, որքան եւ նրա աները՝ Թուրքիայի նախագահ Ռեջեփ Թայիփ Էրդողանը, այս մասին է վկայում գերմանացի լրագրող Դենիզ Յուսելի ձերբակալությունը, գրում է Stern–ը։

«Դենիզ Յուսելը Թուրքիայի այն սակավաթիվ լրագրողներից էր, որոնք համարձակվեցին գրել Ալբայրակի էլեկտրոնային նամակագրության մասին, որը առեւանգվել էր Redhack հաքերական խմբի կողմից։Հիմա Յուսելը կալանավորվել է Ստամբուլում»,- գրում է պարբերականը։

Ընդդիմությունը Էրդողանի փեսային համարում է վարչապետ Բինալի Յըլդըրըմի ազդեցիկ «ստվերը»։

«Ասում են, որ էներգետիկայի նախարարի նկրտումները դուրս են գալիս էներգետիկայի ոլորտից», գրված է հոդվածում։

Մինչդեռ վերջին տարիներին Ալբայրակը բազմիցս հայտնվել է կասկածելի պատմությունների կենտրոնում։ «Ռուս- թուրքական հարաբերություններում սկսված ճգնաժամի ժամանակ Մոսկվան Էրդողանի ընտանիքին ու հենց անձամբ Ալբայրակին էր մեղադրել ԻՊ հետ նավթի ապօրինի առքուվաճառքի մեջ։Մինչ այդ էլ Էրդողանի ընդդիմախոսներն էին նույնատիպ մեղադրանքներ առաջ քաշել», նշում է ֆոն Շվերինը։

Ալբայրակը վաղուց սերտ կապեր ունի նաեւ մեդիա աշխարհի հետ ու նրա էլեկտրոնային փոստից առեւանգված նամակագրությունում հիշատակված էր «տրոլների բանակ» ստեղծելու ծրագրերի մասին, որը պետք է որոշակի ազդեցություն ունենա համացանցում ծավալվող բանավեճերի վրա։ Հենց այդ մասին էր Յուսելը գրել Die Welt թերթում։

Ըստ ընդդիմության առաջնորդ Քեմալ Կիլիչդարօղլուի՝ Յուսելի կալանավորման պատճառը հենց էներգետիկայի նախարարի մասին նրա հրապարակած հոդվածներն էին։ Ընդդիմադիրը ակնարկել է, որ «Հանրապետական ժողովրդական կուսակցությունը» կոմպրոմատ ունի Էրդողանի գահաժառանգ արքայազնի վրա, որը կհրապարակի, երբ գա «ճիշտ ժամանակը», փոխանցում է պարբերականը։

news.am