ՊՆ-ի կենտրոնական դեղաբազայում 40 մլն դրամի հափշտակության դեպք է բացահայտվել․մայոր է ձերբակալվել
Պաշտպանության նախարարության կենտրոնական դեղաբազայում 40 մլն դրամի հափշտակության դեպք է տեղի ունեցել: Այս մասին տեղեկացնում է ՀՀ գլխավոր դատախազությունը:
Աղբյուրի փոխանցմամբ՝ ՊՆ ռազմական ոստիկանության կողմից ձեռնարկված միջոցառումների արդյունքում պարզվել է, որ 2015-2017 թվականների ընթացքում նախարարության N զորամասի (կենտրոնական դեղաբազա) հրամանատարի տեղակալ, մայոր Լ.Ա.-ն եւ պաշտոնատար այլ անձինք շահադիտական նպատակով, չարաշահելով իրենց պաշտոնեական դիրքը եւ ակնհայտ կեղծ տեղեկություններ մտցնելով պաշտոնական փաստաթուղթ հանդիսացող ելքի ապրանքագրերում՝ հափշտակել են շուրջ 40 մլն դրամ ընդհանուր արժողությամբ տարբեր դեղամիջոցներ եւ սարքավորումներ, որն առաջացրել է նյութական ծանր հետեւանքներ:
Քրեական գործ է հարուցվել՝ ՀՀ քրեական օրենսգրքի 375-րդ հոդվածի 3-րդ մասով եւ 314 հոդվածի առաջին մասով:
Լ.Ա.-ն ձերբակալվել է, ձեռնարկվում են անհրաժեշտ քննչական եւ այլ դատավարական, ինչպես նաեւ օպերատիվ-հետախուզական գործողություններ՝ դեպքի բոլոր հանգամանքներն ու ներգրավված անձանց շրջանակը պարզելու եւ նրանց արարքներին քրեաիրավական գնահատական տալու նպատակով: