Գևորգ Թամամյանի թեկնածությունն արձագանք է ստացել միջազգային առողջապահական և գիտական հանրության հեղինակավոր ներկայացուցիչների կողմից

Միջազգային հեղինակավոր գործիչներն ու կազմակերպություններն  աջակցություն են հայտնում ԱՀԿ գլխավոր տնօրենի թեկնածու հայտնի հայ մանկական ուռուցքաբան-արյունաբան, պրոֆեսոր Գևորգ Թամամյանին: Նրա թեկնածությունն արդեն արձագանք է ստացել միջազգային առողջապահական և գիտական հանրության մի շարք հեղինակավոր ներկայացուցիչների կողմից։

Թամամյանին իրենց աջակցությունն են հայտնել համաշխարհային առողջապահության, ուռուցքաբանության և գիտության ոլորտների ճանաչված առաջնորդներ, ինչպես նաև միջազգային մասնագիտական կազմակերպություններ։ Նրանց թվում է Հորդանանի արքայադուստր Դինա Միրեդը՝ համաշխարհային առողջապահության և քաղցկեղի դեմ պայքարի հայտնի ջատագով, Քաղցկեղի վերահսկման միջազգային միության (UICC) նախկին նախագահը։

Շնորհավորելով Գևորգ Թամամյանին՝ արքայադուստր Դինա Միրեդը նրա առաջադրումն անվանել է կարևոր ճանաչում՝ ընդգծելով նրա առաջնորդությունը, փորձն ու նվիրվածությունը համաշխարհային առողջապահությանը։

Հայ բժշկի թեկնածությանն իր լիակատար աջակցությունն է հայտնել նաև աշխարհահռչակ հարավաֆրիկյան-ամերիկացի վիրաբույժ, գիտնական, գյուտարար, գործարար և բարերար դոկտոր Պատրիկ Սուն-Շոնգ՝ Los Angeles Times-ի սեփականատերն ու գործադիր նախագահը։

Իր հրապարակային ուղերձում Սուն-Շոնգը հատկապես ընդգծել է Թամամյանի նվիրվածությունը առողջապահական ծառայություններով անբավարար ապահովված համայնքներին և քաղցկեղի՝ որպես գլոբալ առողջապահական մարտահրավերի վերաբերյալ նրա խորքային ընկալումը՝ հայտարարելով. «Դուք ունեք իմ 100 տոկոսանոց աջակցություն»։

Աջակցության ուղերձներ են ստացվել նաև միջազգային և տարածաշրջանային մասնագիտական կառույցներից, այդ թվում՝ Մանկական ուռուցքաբանության միջազգային ընկերությունից (SIOP), Աֆրիկյան քաղցկեղի կազմակերպությունից (AORTIC) և այլն:

Վերջին օրերին աջակցության ուղերձներով հանդես են եկել նաև տարբեր երկրներ ներկայացնող հարյուրավոր բժիշկներ, գիտնականներ, առողջապահական առաջնորդներ և միջազգային կազմակերպությունների ներկայացուցիչներ։

ԱՀԿ գլխավոր տնօրենի ընտրությունը նախատեսված է 2027 թվականին։