Չինաստանն ու ԱՄՆ-ն օգուտ կստանան համագործակցությունից, սակայն երկու երկրներն էլ կտուժեն հակամարտությունից

ԱՄՆ նախագահ Դոնալդ Թրամփը Սպիտակ տանը հյուրընկալել է Չինաստանի նախագահ Սի Ծինփինին։ Երկու առաջնորդները և նրանց կանայք ներկա են գտնվել պետական ճաշկերույթի։ Այնուհետև Թրամփը ճաշկերույթի հյուրերին հրավիրել է ուսումնասիրելու նոր պարահանդեսային դահլիճի շինհրապարակը, որը նա կառուցում է մոտակայքում։

Ճաշկերույթի ժամանակ իր ելույթում Թրամփն ասել է, որ ինքը և Սի Ծինփինը «հասկանում են, որ ներկայացնում են տարբեր համակարգեր, սակայն մեր ժողովուրդների միջև կապերն անխախտ են, և մենք երբեք ավելի լավ հարաբերությունների մեջ չենք եղել»: «Իմ և նախագահ Սիի միջև ձևավորվել է բարեկամություն, իրականում իսկապես հրաշալի բարեկամություն՝ հիմնված փոխադարձ հարգանքի և մեր ժողովուրդների կենսականորեն կարևոր շահերի վրա»,- ասել է Թրամփը։

Չնայած նման հռետորաբանությանը՝ Վաշինգտոնի և Պեկինի հարաբերությունները Թրամփի նախագահության երկրորդ ժամկետի ընթացքում բավականին լարված էին։ Նրանց միջև գլխավոր խնդիրը դարձավ առևտրային պատերազմը, երբ Սպիտակ տան ղեկավարը բարձր մաքսատուրքեր սահմանեց չինական ապրանքների վրա։

Սպիտակ տանն ունեցած ելույթի ընթացքում Սի Ծինփինի խոսքերում ակնարկ է եղել առևտրային պատերազմի մասին։ «Չինաստանն ու ԱՄՆ-ն օգուտ կստանան համագործակցությունից, սակայն երկու երկրներն էլ կտուժեն հակամարտությունից, - ասել է Չինաստանի ղեկավարը։  - Մեզ պետք չէ խուսափել մրցակցության մասին խոսակցություններից, սակայն մեր մրցակցությունը պետք է լինի առողջ և դուրս չգա որոշակի սահմաններից։ Դա պետք է լինի մրցավազք, որտեղ երկու կողմերն էլ փորձում են հասնել միմյանց, այլ ոչ թե պայքար, որտեղ ինչ-որ մեկը հաղթում է, իսկ մյուսը՝ պարտվում»։

Թրամփն իր հերթին հայտնել է, որ չինական և ամերիկյան իշխանությունները «հասնում են առավել հավասարակշռված առևտրային հարաբերությունների, այդ թվում՝ ամերիկացի ֆերմերների և ռանչոյի տերերի համար չինական շուկա մուտքի ընդլայնմանը»։

Ընդ որում, Չինաստանի ղեկավարը հայտարարել է, որ իր երկիրը և ԱՄՆ-ն պարտավոր են պահպանել լավ հարաբերություններ, քանի որ դրանից է կախված աշխարհի ճակատագիրը․ «Ժամանակակից աշխարհում տեղի ունեցող փոփոխությունների պայմաններում Չինաստանի և ԱՄՆ-ի՝ որպես երկու առաջատար տերությունների համար խիստ կարևոր է պատմական պատասխանատվություն ստանձնել մարդկության առաջընթացի և զարգացման համար», - ասել է Սի Ծինփինը։

Սի Ծինփինը նաև մեկնաբանել է արհեստական բանականության խնդիրը հետևյալ կերպ․ «Մեր երկու երկրներն էլ ունեն հնարավորություններ և կրում են պատասխանատվություն զարգացնելու արհեստական բանականությունը և կառավարելու այն այնպես, որ այն ծառայի բարի նպատակների։ Մենք պետք է անենք այնպես, որ ԱԲ-ն միշտ մնա մարդու վերահսկողության տակ»։