Շիրակի արհեստների և նորարարական տեխնոլոգիաների պետական քոլեջը ստացել է ETF-ի մասնագիտական կրթության գերազանցության վկայական

ԿԳՄՍՆ Շիրակի արհեստների և նորարարական տեխնոլոգիաների պետական քոլեջին Եվրոպական կրթական հիմնադրամի (ETF) կողմից շնորհվել է «Մասնագիտական կրթության գերազանցության հանձնառություն» (Certificate of Commitment to Vocational Excellence) վկայական՝ մասնագիտական կրթության գերազանցության զարգացման ուղղությամբ իրականացված աշխատանքի և ինքնագնահատման գործընթացի արդյունքում։

Քոլեջը 2026 թվականի փետրվարից ներգրավված է ETF-ի համապատասխան աշխատանքային խմբում և իրականացրել է ISATCOVE գործիքի վրա հիմնված ինքնագնահատում։ Գործընթացի շրջանակում գնահատվել են հաստատության առկա կարողություններն ու ձեռքբերումները, առանձնացվել են զարգացման ուղղությունները, ինչպես նաև ներկայացվել է մինչև 2030 թվականը նախատեսված զարգացման պլանը։

Ինքնագնահատման գործընթացում ներգրավված աշխատակիցները ստացել են նաև անհատական թվային վկայականներ։ Քոլեջի ձեռքբերումը ներառվել է նաև ETF-ի՝ մասնագիտական կրթության գերազանցության առցանց գրացուցակում։ Հաստատության փորձը հետագայում կարող է տարածվել Հայաստանի այլ ՄԿՈՒ հաստատություններում՝ նպաստելով մասնագիտական գերազանցության ավելի լայն ցանցի ձևավորմանը։

ETF-ի կողմից ձևավորված Գերազանցության ցանցը (ETF Network for Excellence – ENE) միավորում է մասնագիտական կրթության և ուսուցման հաստատություններին՝ հնարավորություն տալով փոխանակել փորձը, մասնակցել միջազգային նախաձեռնությունների և զարգացնել կարողությունները։

Մասնագիտական կրթության գերազանցությունը դիտարկվում է շարունակական զարգացման գործընթաց, որը ներառում է կրթության որակի բարելավումը, արդյունավետ կառավարումը, նորարարությունների ներդրումը, գործատուների հետ համագործակցության զարգացումը, սովորողների ուսումնառության արդյունքների բարելավումը, ինչպես նաև կրթական ծրագրերի համապատասխանեցումը տարածաշրջանի սոցիալ-տնտեսական և աշխատաշուկայի կարիքներին։

Այս գործընթացի կարևոր բաղադրիչներից է հաստատությունների ինքնագնահատումը։ ETF-ի ISATCOVE գործիքը հնարավորություն է տալիս ՄԿՈՒ հաստատություններին համակարգված ձևով գնահատել սեփական գործունեությունը, բացահայտել զարգացման կարիքները և դրանց հիման վրա սահմանել հետագա առաջնահերթությունները։

Այս համատեքստում նախատեսվում է շարունակել ETF-ի հետ համագործակցությունը և Շիրակի արհեստների և նորարարական տեխնոլոգիաների պետական քոլեջի փորձի հիման վրա դիտարկել մասնագիտական կրթության գերազանցության կենտրոնի ձևավորման ու զարգացման հնարավորությունները՝ համակարգում ներգրավելով այլ ՄԿՈՒ հաստատությունների։

Նման կենտրոնը կարող է նպաստել ոչ միայն ուսումնական հաստատության կրթական կարողությունների զարգացմանը, այլև գործատուների և ոլորտային կազմակերպությունների հետ համագործակցության խորացմանը, ժամանակակից ու նորարարական կրթական մոտեցումների տարածմանը, մանկավարժական աշխատողների մասնագիտական զարգացմանը և ՄԿՈՒ համակարգում հաջողված փորձի փոխանակմանը։

Գերազանցության կենտրոնի ձևավորումը կարող է ունենալ նաև տարածաշրջանային նշանակություն՝ նպաստելով աշխատաշուկայի պահանջներին համապատասխան մասնագիտական հմտությունների զարգացմանը և կրթություն–աշխատաշուկա կապի ամրապնդմանը։