Որպեսզի ՀՀ-ից դուրս գա բացարձակապես բարձր որակի արտադրանք

Համախառն արտահանված գյուղմթերքի՝ անցյալ տարվա և այս տարվա ծավալները քիչ թե շատ համադրելի են, 5 տոկոս է տարբերությունը: Կառավարության նիստի ժամանակ ասաց փոխվարչապետ Մհեր Գրիգորյանը:

«Ունենք ուղղություններ, որտեղ աճեր ունենք, և ուղղություններ ունենք, որտեղ նվազում ունենք, բայց այդ նվազումները դժվար է միայն պայմանավորել այն հանգամանքով, որ սահմանափակումներ կան: Օրինակ՝ անցյալ տարի արտահանել ենք 40 հազար տոննայից ավելի ծիրան, այս տարի արտահանել ենք 12-13 հազար տոննա, բայց խնդիրն այն է, որ չի եղել ծիրան, այսինքն՝ ինչքան եղել է, այդքան արտահանել ենք: Եթե լիներ, օրինակ, 30 հազար տոննա ծիրան, իմ կարծիքով՝ 30-ն էլ կարտահանվեր ամենայն հավանականությամբ: Այստեղ եղանակային, կլիմայական պայմանները ևս ազդեցություն են ունեցել»,- նշեց էկոնոմիկայի նախարար Գևորգ Պապոյանը:

«Կան ուղղություններ, որտեղ աճ ունենք: Պտուղ-բանջարեղենի պահածոյի արտահանումն աճել է 18 տոկոսով: Չոր բանջարեղենի արտահանումն աճել է 64 տոկոսով: Հայկական բրենդիի արտահանումը՝ 10 տոկոսով, կենդանիների արտահանումը՝ 21 տոկոսով: Կան ուղղություններ, որտեղ նվազում կա, օրինակ՝ ծաղիկների դեպքում ունենք նվազում, բայց ես նաև ներկայացնեմ փոխհատուցման թիվը, որը 4.6 մլրդ դրամ է մոտավորապես: Հիմնականում ինչ ենք արտահանել դրա դիմաց:

Խոշոր ուղղություններից լոլիկն է՝ մոտ 3000 տոննա, ավելի քան 2200 տոննա պղպեղ ենք արտահանել, 3.9 մլն հատ ծաղիկ ենք արտահանել, դեղձը՝ ավելի քան 2200 տոննա, շշալցված գինին՝ 292 000 լիտր, շշալցված պտղա-հատապտղային գինին՝ 336 հազար լիտր, հայկական բրենդին՝ 837 հազար լիտր, բայց 100 տոկոս սպիրտի հաշվարկով, և այսպես շարունակ:

Մեր ծրագրերի շնորհիվ է նաև, որ այս արտահանումները տեղի են ունենում: Մեր ծրագրերի շնորհիվ է, որ նոր շուկաներում, այդ թվում՝ եվրոպական շուկայում, Մերձավոր Արևելքի շուկաներում հայկական ապրանքները սկսում են դիրքավորվել: Դա հեշտ չի, մենք ինչ-որ ժամանակ պետք է նաև աջակցենք, որ իրենք կարողանան այնտեղ ճանաչելիություն ձեռք բերել, վստահություն ձեռք բերել, և այսպես շարունակ»,- նշեց Պապոյանը:

Նա ընդգծեց, որ հաջորդ ամիսներից ավելի երկարաժամկետ ու ռազմավարական լուծումների պետք է գնան: «Զուգահեռ մենք մշտապես այդ վարժությունները արել ենք, ճշգրտումներ ենք մտցրել, որոշ դեպքերում փոխհատուցման չափն իջեցրել ենք, որոշ դեպքերում ավելացրել ենք, որովհետև հասկացել ենք, որ, նախ, եթե ռազմավարական կարևորություն ունեցող ապրանք է մեզ համար, և այստեղ բավականին լավ ենթակառուցվածք է ստեղծվել, և պոտենցիալ էլ կա վաճառելու, բայց միևնույն ժամանակ զգացել ենք, որ փոխհատուցման ծավալը միգուցե բավարար չէ, ավելացրել ենք. շուկաների ավելի խոր ուսումնասիրության դեպքում տեսել ենք, որ հնարավորություն կա իջեցնելու:

Եվ զուգահեռ՝ կարևոր է նաև այն հանգամանքը, որ ՍԱՏՄ գործընկերները նաև իմ խնդրանքով շատ խիստ ուսումնասիրություն են անում սահմանին, որպեսզի ՀՀ-ից դուրս գա բացարձակապես բարձր որակի արտադրանք: Այստեղ շատ կարևոր է, որ մենք վստահ լինենք, որ այն արտադրանքը, որ դուրս է գալիս ՀՀ-ից, բարձր որակի է և արտաքին շուկաներում պահանջարկ է ունենալու: Ունենում ենք դեպքեր, որ մենք ուղղակի հետ ենք ուղարկում այդ ապրանքը, նույնիսկ համաձայն չենք դա անգամ փոխհատուցում չվճարելով թողնել, որ գնա, որովհետև սա արդեն երկրի հեղինակության հարցն է»,- ասաց էկոնոմիկայի նախարարը:

Անդրադառնալով մթերումներին՝ Պապոյանն ասաց. «81 տոննա թուզ է մթերվել և 5200 տոննա դեղձ է մթերվել: Այս տարի բերքը շատ է, ես 2 անգամ այց եմ ունեցել, և բավականին մեծ ծավալով՝ տասնյակ մեքենաներով հերթեր են կանգնած, դեղձը մթերվում է, և լավ է, որ բոլոր կազմակերպությունները նշում են, որ սա իրենց համար լավ հնարավորություն է:

Խաղողի դեպքում մենք անցած ամիս 120 տոննա խաղող ենք արտահանել: Հիմնական մասը մեզ մոտ տեխնիկական սորտեր են, մթերումներ են իրականացնում: Ես երեկ մի գործարանում էի, որն արդեն մոտավորապես 5000 տոննա մթերել էր և պատրաստվում էր ևս 16 հազար տոննա մթերել: Այսինքն՝ այս տարի այդ գործարանը կմթերի 21 հազար տոննա:

Պարբերական այցեր կանեմ նաև մյուս գործարաններ՝ իրավիճակին ծանոթանալու: Այս պահի դրությամբ խաղողի մթերման գործընթացը ամբողջ ծավալով ընթանում է»: