Երբ փորձում էինք փնտրել ուրիշ տեղ, զենքի մատակարարման շուկաները փակ էին մեզ համար

Վարչապետ Նիկոլ Փաշինյանը «Համապարփակ անվտանգություն և դիմակայունություն» համաժողովում ունեցած ելույթում հայտարարել է, որ համապարփակ անվտանգություն կառուցելու ճանապարհին շատ էական է, թե ինչպես ենք մենք մտածում և ընկալում հարցերը։ «Մեր անվտանգային շատ խնդիրներ, կարող է պարզվել, որ սկսվում են մեր մտքում, իրականության և միջավայրի մեր ընկալումների մեջ։ Ու այդ խնդիրն այսօր առկա է ՀՀ-ում»,- ասել է նա։

Ըստ վարչապետի՝ «Հայաստանի և Ադրբեջանի միջև խաղաղության համաձայնագրի բանակցությունների հաջող ավարտը տեղի ունեցավ, երբ մենք «X» պահի որոշեցինք դուրս գալ մեխանիկական փոխադարձության սկզբունքից։ Տեսանք, որ կա մի իրավիճակ, որ խաղաղության համաձայնագրի տեքստը «պինգ-պոնգով» ավելի լավը դարձնելու որևէ պոտենցիալ այլևս չկա։ Եվ մեր առաջ եկավ ընտրություն՝ շարունակել փոխադարձության այդ «պինգ-պոնգը», թե գնալ այլ տրամաբանություն կառուցելու ճանապարհով։ Մենք կայացրինք որոշում, որ համաձայնվում ենք այս տեքստին»։

Նիկոլ Փաշինյանը խոսել է նաև օտարերկրյա պետություններից զենքի ձեռքբերման գործընթացին. «2022-ի օգոստոսի դրությամբ ՀՀ-ին զենք վաճառող պետությունների թիվը 0 էր։ 100 միլիոնավոր դոլարներով փոխանցած գումարներ ունեինք, մեզ մեր վճարած զենքը չէին տալիս։ Երբ փորձում էինք փնտրել ուրիշ տեղ, զենքի մատակարարման շուկաները փակ էին մեզ համար»,- ասել է նա։