Նոր ուսումնական տարին՝ ընթերցանության տարի․ Ժաննա Անդրեասյանը ներկայացնում է կրթության ոլորտի առաջիկա ծրագրերը

2026-2027 ուսումնական տարին Հայաստանում անցնում է ընթերցանության խթանման ներքո։ Կրթության, գիտության, մշակույթի և սպորտի նախարար Ժաննա Անդրեասյանը ասուլիսի ժամանակ նշում է, որ ինչպես նախորդ տարիներին, այս ուսումնական տարին ևս ունենալու է առանձնահատուկ խորագիր։ Այս տարի այն լինելու է ընթերցանության տարի։

Ուսումնական տարին մեկնարկում է գրքի միջազգային փառատոնով։ Նախարարը ներկայացնում է նաև ընթերցանությանն ուղղված նախարարության առաջիկա ծրագրերն ու նախաձեռնությունները՝ ընդգծելով ընթերցանության նկատմամբ հետաքրքրության խթանման անհրաժեշտությունը։

Ասուլիսի ընթացքում անդրադարձ է կատարվում նաև արհեստական բանականության ուսումնասիրմանը։ Ժաննա Անդրեասյանի խոսքով՝ ավագ դասարաններում և բուհական համակարգում արհեստական բանականության ուսուցումը նախատեսվում է դարձնել պարտադիր։ Այս ուղղության ուսումնասիրմանը կրթական համակարգում մեծ դեր է հատկացվելու։

Քննարկվում է նաև դպրոցական հոգեբանների աշխատանքի արդյունավետության հարցը։ Նախարարության ծրագրերում նախատեսվում է ուժեղացնել դպրոցական հոգեբանների դերը՝ դպրոցներում առկա խնդիրներն ավելի վաղ հայտնաբերելու և դրանց կանխարգելման ուղղությամբ աշխատանք իրականացնելու նպատակով։

Բանակում հետագայում ողբերգական դեպքերի կանխարգելման համատեքստում անդրադարձ է կատարվում նաև ձևավորված աշխատանքային խմբի աշխատանքներին։ Նախարարի ներկայացմամբ, իրականացվելու է վերլուծական աշխատանք՝ պարզելու, թե դպրոցական տարիներից սկսած ինչ բացեր կարող են առկա լինել և ինչ խնդիրներ են կրթական համակարգից փոխանցվում հետագա փուլեր։ Այս աշխատանքի նպատակներից մեկը կրթության ընթացքում հնարավոր խնդիրների բացահայտումն ու դրանց ուղղությամբ համապատասխան քայլերի մշակումն է։

Ասուլիսի ընթացքում անդրադարձ է կատարվում նաև կրթական համակարգում ներդրված նոր գործիքին՝ kadrer.emis.am հարթակին։ Թափուր աշխատատեղերի վերաբերյալ հարցին նախարարը քաղաքացիներին ուղղորդում է այս հարթակ՝ համապատասխան տեղեկատվությանը ծանոթանալու համար։

Բուհական համակարգում առկա խնդիրներն էլ են քննարկվում։ Հարց է բարձրացվում, որ համալսարաններում տեսական դասերի մեծ ծավալի պայմաններում ուսանողները հաճախ ավարտելուց հետո դժվարանում են իրենց տեղը գտնել աշխատաշուկայում։

Նախարարը նշում է, որ այս խնդրի լուծման ուղղությամբ նախարարությունը պատրաստվում է մշակել նոր գործիքակազմ։ Նպատակն է համալսարաններում մեծացնել գործնական հմտությունների զարգացման հնարավորությունները, որպեսզի ուսանողների ստացած գիտելիքներն ավելի կիրառելի լինեն աշխատաշուկայում, իսկ կրթական համակարգը ավելի արդյունավետ կապվի աշխատաշուկայի պահանջների հետ։

Ասուլիսի ժամանակ կրկին անդրադարձ է կատարվում Հայոց պատմության դասագրքերում «Արևմտյան Հայաստան» եզրույթի, ինչպես նաև «Արարատ» հասկացության կիրառման վերաբերյալ քննարկումներին։ Ժաննա Անդրեասյանը նշում է, որ այս հարցում փոփոխություններ չեն նախատեսվում։ Միաժամանակ, ըստ նախարարի, դասագրքերի բովանդակությանը և կիրառվող ձևակերպումներին պետք է մոտենալ Հայաստանի Հանրապետության դիրքից։

Կրթական ոլորտի մեկ այլ կարևոր ուղղություն էլ ուսուցիչների կամավոր ատեստավորումն է։ Նախարարությունը նպատակ ունի հնարավորինս մեծացնել ատեստավորված ուսուցիչների թիվը։ Այն ուսուցիչները, որոնք հաղթահարում են սահմանված շեմը, հնարավորություն են ստանում մասնակցելու պետության կողմից ֆինանսավորվող դասընթացների։

Այսպիսով, առաջիկա ուսումնական տարվա օրակարգում ոչ միայն ընթերցանության խթանումն է, այլև կրթության տարբեր մակարդակներում նոր գործիքների ներդրումը՝ դպրոցական հոգեբանների աշխատանքից և արհեստական բանականության ուսումնասիրմանից մինչև բուհական կրթության գործնական բաղադրիչի ուժեղացում և ուսուցիչների մասնագիտական զարգացում։

Հեղինակ՝ Շողեր Ղլիջյան