Հացահատիկային մշակաբույսերի ցանքատարածություններն աճել են 

2026 թվականի բերքի համար Հայաստանում հացահատիկային և հատիկաընդեղենային մշակաբույսերի ցանքատարածությունները կազմել են 130 հազար 359 հեկտար՝ նախորդ տարվա համեմատ աճելով 18.3 տոկոսով։ Տվյալները ներկայացված են ՀՀ վիճակագրական կոմիտեի՝ 2026 թվականի բերքի համար գյուղատնտեսական մշակաբույսերի ցանքային տարածությունների համատարած հաշվառման տվյալներում։

Ամենամեծ ցանքատարածությունները, ըստ այդ տվյալների, Շիրակի մարզում են՝ 40 հազար 643 հեկտար։ Գեղարքունիքում այդ տարածքը կազմել է 25 հազար 175 հեկտար, Սյունիքում՝ 17 հազար 909, իսկ Արագածոտնում՝ 16 հազար 906 հեկտար։

Նախորդ տարվա համեմատ հացահատիկային և հատիկաընդեղենային մշակաբույսերի ցանքատարածություններն աճել են գրեթե բոլոր մարզերում։ Ամենամեծ աճը գրանցվել է Տավուշում՝ 33.4 տոկոս, Գեղարքունիքում՝ 29.9 տոկոս և Սյունիքում՝ 27.7 տոկոս։ Դրան հակառակ, Արարատի մարզում ցանքատարածությունը նախորդ տարվա համեմատ փոքր-ինչ նվազել է՝ 0.3 տոկոսով, իսկ Արմավիրում՝ 3.3 տոկոսով։

Պատկերը մյուս մշակաբույսերի դեպքում

2026 թվականի բերքի համար կարտոֆիլի ցանքատարածությունները կազմել են 16 հազար 461 հեկտար՝ նախորդ տարվա համեմատ աճելով 1.8 տոկոսով։ Բանջարանոցային մշակաբույսերի ցանքատարածությունը կազմել է 16 հազար 849 հեկտար և նախորդ տարվա համեմատ նվազել է 0.9 տոկոսով։ Բոստանային մշակաբույսերի դեպքում նվազումն ավելի մեծ է՝ 11.1 տոկոս։ Դրանց ցանքատարածությունը կազմել է 3 հազար 540 հեկտար։ Կերային մշակաբույսերի ցանքատարածությունները կազմել են 48 հազար 618 հեկտար՝ նախորդ տարվա համեմատ աճելով 1.3 տոկոսով։ Տեխնիկական մշակաբույսերի դեպքում, հակառակ պատկերն է․ դրանց ցանքատարածությունը կազմել է 662 հեկտար՝ մեկ տարվա ընթացքում նվազելով 18.2 տոկոսով։

Այսպիսով, 2026 թվականի բերքի համար գյուղատնտեսական մշակաբույսերի ցանքատարածությունների կառուցվածքում առավել նկատելի փոփոխությունը հացահատիկային և հատիկաընդեղենային մշակաբույսերի տարածքի աճն է։ Միաժամանակ մի շարք այլ մշակաբույսերի, մասնավորապես բոստանային և տեխնիկական մշակաբույսերի ցանքատարածությունները նախորդ տարվա համեմատ նվազել են։

Արմեն Խեչումյան