Աննա Վարդապետյանը Կառավարության նիստում մանրամասներ է ներկայացրել ապօրինի գույքի բռնագանձման գործերով կայացված վճիռներից և հայցերից

Հայաստանի Հանրապետության գլխավոր դատախազ Աննա Վարդապետյանն այսօր Կառավարության նիստում անդրադարձել է ապօրինի ծագում ունեցող գույքի բռնագանձման գործերով կայացված վճիռներին և ներկայացված հայցերին:

Աննա Վարդապետյանը, մասնավորապես, նշել է.

«Բոլորովին վերջերս՝ 2026 թվականի հուլիսի 24-ին, Հակակոռուպցիոն դատարանի կողմից մասնակի բավարարվել է Դատախազության հայցը՝ ընդդեմ Արագածոտնի նախկին մարզպետ Սարգիս Սահակյանի և նրան փոխկապակցված անձանց: Դատական ակտն օրինական ուժի մեջ մտնելուց հետո հօգուտ Հայաստանի Հանրապետության ենթակա է բռնագանձման.

• Երևան քաղաքի Արաբկիր վարչական շրջանում գտնվող մեկ բնակարանի 45%-ը. 
• Արագածոտնի մարզի Աշտարակ քաղաքում գտնվող մեկ բնակելի տունն ամբողջությամբ.
• 184 միլիոն 222 հազար 585 դրամ:

Նշեմ, որ Սարգիս Սահակյանի վճռից բացի, ունենք այլ անձանց վերաբերյալ կայացված վճիռներ, որոնք դեռևս օրինական ուժի մեջ չեն մտել:

Մասնավորապես՝

1. Հակակոռուպցիոն դատարանը 2026 թվականի հուլիսի 3-ին մասնակի բավարարել է Գլխավոր դատախազության հայցն ընդդեմ ՀՀ երրորդ նախագահ Սերժ Սարգսյանի և նրան փոխկապակցված անձանց: Դատական ակտն օրինական ուժի մեջ մտնելուց հետո հօգուտ Հայաստանի Հանրապետության ենթակա է բռնագանձման.

• Երևան քաղաքում գտնվող 3 անշարժ գույք, որոնցից 1 կբռնագանձվի ամբողջությամբ, 2 գույքերի՝ ապօրինի գնահատված մասերը.
• Բանկում ներդրված 202 միլիոն 998 հազար դրամ ավանդները, դրանցից կուտակված ընդհանուր՝ 74 միլիոն 716 հազար դրամ տոկոսագումարները.
• 352 միլիոն 438 հազար դրամ:

2. Հակակոռուպցիոն դատարանը 2026 թվականի հունիսի 5-ին մասնակի բավարարել է Գլխավոր դատախազության հայցն ընդդեմ Հրազդանի նախկին քաղաքապետ Արամ Դանիելյանի և նրան փոխկապակցված անձանց: Դատական ակտն օրինական ուժի մեջ մտնելուց հետո հօգուտ Հայաստանի Հանրապետության ենթակա է բռնագանձման.

• 8 անշարժ գույք, որոնցից 4-ը կբռնագանձվի ամբողջությամբ, մյուս 4-ը՝ ապօրինի ճանաչված մասերով.
• 1 իրավաբանական անձում 50% մասնակցությունը.
• 2 տրանսպորտային միջոց.
• 2 անշարժ գույքի և 1 տրանսպորտային միջոցի բռնագանձման անհնարինությամբ պայմանավորված դրանց արժեքը՝ շուրջ 25 միլիոն դրամ.
• 85 միլիոն 430 հազար դրամ:

3. Հակակոռուպցիոն դատարանը 2026 թվականի ապրիլի 21-ին մասնակի բավարարել է Գլխավոր դատախազության հայցն ընդդեմ ՀՀ երրորդ նախագահ Սերժ Սարգսյանի եղբոր դուստր՝ Անի Սարգսյանի: Դատական ակտն օրինական ուժի մեջ մտնելուց հետո հօգուտ Հայաստանի Հանրապետության ենթակա է բռնագանձման.

• Էլեկտրաէներգիայի արտադրությամբ զբաղվող ընկերության 39341 հատ բաժնետոմս.
• 864 հազար ԱՄՆ դոլար ավանդ.
• 10 միլիոն 200 հազար դրամ.
• 4853 եվրո.
• 2 միլիոն 643 հազար դրամ:

4. Հակակոռուպցիոն դատարանը 2025 թվականի հոկտեմբերի 10-ին մասնակի բավարարել է Գլխավոր դատախազության հայցն ընդդեմ Ազգային ժողովի նախկին պատգամավոր Մանվել Գրիգորյանի ժառանգների և նրան փոխկապակցված անձանց: Դատական ակտն օրինական ուժի մեջ մտնելուց հետո հօգուտ Հայաստանի Հանրապետության ենթակա է բռնագանձման.

• 9 անշարժ և 6 շարժական գույք.
• 1 իրավաբանական անձում մասնակցություն.
• 340 միլիոն դրամ:

Ապօրինի ծագում ունեցող գույքի բռնագանձման լիազորության շրջանակում, օրինական ուժի մեջ մտած վճիռներով և հաշտություններով, Հայաստանի Հանրապետությանը վերադարձված գույքի և դրամական միջոցների արժեքը կազմում է շուրջ 6 միլիարդ 300 միլիոն դրամ (շուրջ 17 միլիոն ԱՄՆ դոլար)։

Մասնավորապես, այս պահի դրությամբ օրինական ուժի մեջ մտած 2 դատական ակտերի և 11 հաշտության համաձայնությունների արդյունքում հօգուտ Հայաստանի Հանրապետության բռնագանձվել է 12 անշարժ գույք, 2 շարժական գույք, 2000 բաժնետոմս, Հայաստանի Հանրապետությանն է փոխանցվել նաև 264 հազար ԱՄՆ դոլարի փոխառության պահանջի իրավունքը, ինչպես նաև ավելի քան 1 միլիարդ դրամ։

Կոտայքի նախկին մարզպետ Կարապետ Գուլոյանի գործով դատարանը բավարարել էր նաև շուրջ 1 միլիարդ 300 միլիոն դրամական պահանջ, որն ուղարկվել է հարկադիր կատարման ծառայություն բռնագանձումն ապահովելու նպատակով:

2026 թվականի հունիսի 17-ին կնքվել է ևս մեկ հաշտության համաձայնություն, որը մտել է օրինական ուժի մեջ։ Նշված հաշտության արդյունքում պետությանը ենթակա է վերադարձման ավելի քան 304 միլիոն դրամ։

Ինչ վերաբերում է ապօրինի ծագում ունեցող գույքի բռնագանձման լիազորության շրջանակում դատարան ներկայացված հայցերին, ապա նշեմ, որ ներկայում Հակակոռուպցիոն դատարանում քննվում է 172 հայց, իսկ 2-ը դեռևս չեն ընդունվել վարույթ։ Դատարանում քննվող հայցերի ընդհանուր հայցագինը կազմում է շուրջ 628 միլիարդ 600 միլիոն դրամ։ Հայցերով պահանջվում է բռնագանձել 1486 անշարժ գույք, 371 շարժական գույք, 464 իրավաբանական անձանցում մասնակցություն, ինչպես նաև դրամական միջոցներ, որոնց ընդհանուր չափը կազմում է շուրջ 464 միլիարդ 600 միլիոն դրամ»: