Պետրոս Ղազարյանը վերադառնում է չնախատեսված արձակուրդից

«Կենտրոն» հեռուստաընկերության մեկնաբան Պետրոս Ղազարյանը, Tert.am-ի հետ զրույցում անդրադառնալով դերասան Սերգեյ Դանիելյանի հետ իր հայտնի հարցազրույցից հետո հեռուստաընկերությունից իր հեռանալուն և վերադառնալուն, նշեց, որ վերադառնում է և ամենաուշը երկուշաբթի օրը նորից կլինի եթերում:

-Պետրո՛ս, երեկ Ձեր ֆեյսբուքյան էջում դրել էիք «Տերմինատոր» ֆիլմից հատված, որտեղ Շվարցենեգերն ասում է իր հանրահայտ I’ll be back արտահայտությունը։ Սակայն չնայած սրան և ի հակառակ մամուլի տեղեկությունների, որ վերադառնում եք «Կենտրոն», առ այսօր չեք վերադարձել:
-Իրականում ես վերադարձել եմ, հիմա մի քիչ վատառողջ եմ: Հավանաբար երկուշաբթի օրվանից կմտնեմ եթեր: Հավանաբար այն առումով, որ եթե ավելի շուտ լավանամ, ավելի շուտ կլինեմ եթերում:

-Ձեր «Ուրվագիծ» հաղորդաշարո՞ւմ:
-Ե՛վ «Ուրվագիծ», և՛ իմ «թոք շոուն»:

-Իսկ ի՞նչն էր պատճառը, որ ձգձգվում էր Ձեր վերադարձը:
-Արձակուրդում էի:

-Այսինքն՝ կարելի՞ է ենթադրել, որ այսպես ասենք՝ ՔԱՔ նախաձեռնության զոհը չէիք դարձել իրականում: Եվ չե՞ք ափսոսում Սերգեյ Դանիելյանի հետ Ձեր այդ հարցազրույցի համար:
-Ես, ճիշտն ասած, չեմ հասկանում՝ ինչ է նշանակում «ափսոսալ հարցազրույցի համար», և հարցազրույցը հասարակությունն է գնահատում: Եվ հարցազրույցը լինում է լավը կամ վատը:

-Հիմա բոլորը բոլորի հետ դաշինքներ են կազմում, գրեթե բոլորին այս կամ այն կուսակցություն կամ կուսակցությունների դաշինք մտնելու առաջարկներ են արվում: Ձեզ եղե՞լ է առաջարկ՝ ինչ-որ քաղաքական դաշինքի մեջ մտնելու: Եթե այո, ապա կարո՞ղ եք ասել՝ որ քաղաքական ուժի կողմից:
-Եղելը եղել է, ու ոչ՝ մեկից (կուսակցությունից և կամ կուսակցությունների դաշինքից), բայց ես, ճիշտն ասած, իմ ոլորտը փոխելու ցանկություն չունեմ, որովհետև ես սիրում եմ իմ մասնագիտությունը, գտնում եմ, որ այստեղ ավելի օգտակար կլինեմ, քան Ազգային ժողովում: Բայց, ճիշտն ասած, ես դաշինքների մեջ ոչ մի վատ չեմ տեսնում: Հիմա մի տեսակ միտում կա, որ բոլորը ծաղրում են դաշինքները, բոլորը չգիտեմ ինչեր են ման գալիս, բայց ասեմ՝ համաձայն Սահմանադրության, էս քաղաքական իրավիճակում հակառակ տենդենցը պետք է զարմանալի լիներ, եթե այդ դաշինքները չկազմվեն: Քաղաքական ուժերը կենսունակ լինելու համար ստիպված են գնալ դաշինքների: Այլ ճանապարհ չկա պարզապես: Եթե ասում են՝ «գաղափարական չեն», գիտեք` ծիծաղելի է։ Ես երկուշաբթի կանդրադառնամ հենց այդ թեմային, բայց վաղուց Հայաստանում գաղափարախոսությունը քաղաքական կատեգորիա չէ: Ու էդ տենդենցը նաև աշխարհում է, դասական լիբերալիզմ, դասական սոցիալիզմ, դասական, չգիտեմ, պահպանողական կամ մարքսիստ և այլն, այս կատեգորիաները մահացել են: Հիմա մի բան կա աշխարհում՝ պրագմատիզմ, և բոլորը պրագմատիկ են, պրագմատիզմի կրողն են՝ լինի դաշնակ, լինի «Օրինաց երկիր», թե հանրապետական: Այնպես որ, նորմալ եմ նայում այդ դաշինքներին, ի տարբերություն շատերի: