«Բարսելոնան» հաղթել է «Ռեալին» և հռչակվել Իսպանիայի չեմպիոն

Իսպանիայի Լա լիգայի 35-րդ տուրի կենտրոնական հանդիպումում կայացավ հերթական Էլ Կլասիկոն․ «Բարսելոնան» «Սփոթիֆայ Կամպ Նոու» մարզադաշտում ընդունեց Մադրիդի «Ռեալին»։ Ալեխանդրո Էռնանդեսի սպասարկած խաղում կատալոնական ակումբը վստահ հաղթանակ տոնեց 2:0 հաշվով։

​Հանդիպման ելքը վճռվեց արդեն առաջին խաղակեսի սկզբնամասում։ 9-րդ րոպեին հաշիվը բացեց տանտերերի հարձակվող Մարկուս Ռեշֆորդը, իսկ 18-րդ րոպեին Ֆեռան Տոռեսը կրկնապատկեց «կապտանռնագույնների» առավելությունը՝ ձևակերպելով հանդիպման վերջնահաշիվը։

​Այս հաղթանակի շնորհիվ «Բարսելոնան» ժամկետից շուտ ապահովեց Իսպանիայի չեմպիոնի տիտղոսը։

Հանս-Դիտեր Ֆլիկի թիմը վաստակեց 91 միավոր և անհասանելի դարձավ մրցակիցների համար:

Մադրիդի «Ռեալը» 77 միավորով երկրորդ տեղում է։ Առաջնության ավարտին մնացել է ընդամենը երեք տուր: Հատկանշական է, որ «Բարսելոնան» իր պատմության մեջ 29-րդ անգամ նվաճեց երկրի չեմպիոնի կոչումը։

​Հաջորդ տուրում նորընծա չեմպիոնները մայիսի 13-ին արտագնա խաղում կմրցեն «Ալավեսի» հետ, իսկ Ալվարո Արբելոայի գլխավորած Մադրիդի թիմը մայիսի 14-ին սեփական հարկի տակ կընդունի «Օվիեդոյին»։

Աղբյուր՝ armsport.am