Armat Fight Show. Միհրան Հարությունյանը փայլուն հաղթանակ տարավ երևանյան մրցաշարում

Ռիոյի Օլիմպիական խաղերի և Եվրոպական խաղերի արծաթե մեդալակիր, հունահռոմեական ոճի ըմբշամարտի Հայաստանի հավաքականի նախկին անդամ Միհրան Հարությունյանը վստահ հաղթանակով է նշանավորել իր առաջին մենամարտը հայաստանյան խառը մենամարտերի (MMA) ասպարեզում:

Երևանի «Տաշիր Արենայում» պատմության մեջ առաջին անգամ կազմակերպված «Armat Fight Show» մրցաշարի շրջանակում հայ մարզիկն ուժերը չափեց Ռուսաստանի և Տաջիկստանի չեմպիոն Մագոմեդռասուլ Հասանովի հետ: Սեփական հարկի տակ ու երկրպագուների բուռն աջակցության ներքո Հարությունյանը գերազանց մենամարտ անցկացրեց՝ երկրորդ ռաունդում տեխնիկական նոկաուտով ժամանակից շուտ պարտության մատնելով մրցակցին:

Մրցաշարի գլխավոր իրադարձությունների ծրագրում հաղթանակ տոնեց նաև Աղասի Հակոբյանը, որը մեկնարկային դիմակայությունում առավելության հասավ բրազիլացի Ռոնինսոն «Ռատինյո» Էնրիկեի նկատմամբ: Ինչ վերաբերում է երեկոյի գլխավոր մենամարտին, ապա Գենադի Մակարյանը, ցավոք, զիջեց մեկ այլ բրազիլացի մարտիկի՝ Դիեգո Դիասին:

Հիշեցնենք, որ Միհրան Հարությունյանն իր նախորդ պրոֆեսիոնալ մենամարտում ևս հաղթանակ էր գրանցել. ընթացիկ տարվա փետրվարին Լոս Անջելեսում կայացած «UpNextFighting 30» մրցաշարի 66,5 կգ քաշային կարգում նա մրցավարների միաձայն որոշմամբ պարտության էր մատնել ամերիկացի Շեյն Տորեսին: