Ռուբիոն և Կոբախիձեն հեռախոսազրույց են ունեցել

ԱՄՆ պետքարտուղար Մարկո Ռուբիոն հեռախոսազրույց է ունեցել Վրաստանի վարչապետ Իրակլի Կոբախիձեի հետ։ Այս մասին տեղեկատվություն է տարածել ԱՄՆ պետքարտուղարությունը։ «Պետքարտուղար Մարկո Ռուբիոն այսօր զրուցել է Վրաստանի վարչապետ Իրակլի Կոբախիձեի հետ։ Նրանք քննարկել են փոխադարձ հետաքրքրություն ներկայացնող ոլորտներ, այդ թվում՝ Կովկասում և Սևծովյան տարածաշրջանում անվտանգությունը»,- ասվում է Պետքարտուղարության խոսնակ Թոմի Պիգոտի հայտարարության մեջ։

Վրացական կողմի տարածած հաղորդագրության մեջ էլ ասվում է, որ կողմերը քննարկել են «գործընկերության վերանայման» և Վրաստանի դերը Կովկասյան տարածաշրջանում։

«Ես արդյունավետ հեռախոսազրույց ունեցա պետքարտուղար Մարկո Ռուբիոյի հետ։ Մենք քննարկեցինք մեր գործընկերության վերանայման և Վրաստանի՝ որպես Հարավային Կովկասում ուժեղ գործընկերոջ դերի ամրապնդման կարևորությունը։ Մենք հանձնառու ենք Վրաստան-ԱՄՆ կապերի ամրապնդմանը, տարածաշրջանային կայունության և կապակցվածության խթանմանը»,- գրել է Իրակլի Կոբախիձեն։