Մեր թիմում բոլորը պրոֆեսիոնալներ են

Ֆուտզալի Հայաստանի հավաքականի անդամ Միհրան Դերմենջյանը մեկնաբանել է Եվրո-2026-ի առաջին խաղում Ուկրաինայի նկատմամբ տարած հաղթանակը: Լիտվայի Կաունաս քաղաքի «Ժալգիրիս Արենայում» Ռուբեն Նազարեթյանի գլխավորած թիմը հասավ կամային հաղթանակի 2:1 հաշվով։ Միհրան Դերմենջյանը դարձավ դուբլի հեղինակ:

«Ուկրաինան շատ բարդ մրցակից էր: Դաշտ էինք դուրս եկել մարզիչների ցուցումները լսելով: Ճիշտ է՝ առաջինը գոլ բաց թողեցինք, բայց, չընկճվելով, խփեցի առաջին գոլը, հետո՝ երկրորդը, որի կապակցությամբ շատ ուրախ եմ: Իմ կարծիքով՝ մեր թիմը մյուսներից տարբերվում է նրանով, որ մենք չենք ընկճվում: Այստեղ բոլորն էլ պրոֆեսիոնալներ են, մարզիչներն էլ՝ խաղի սցենարն ասելով, մեզ ցուցումներ էին տվել, որ խաղում ենք մինչեւ մրցավարի սուլիչը»,- ասել է Միհրան Դերմենջյանը:

Երկրորդ տուրում Հայաստանի մրցակիցը կլինի Չեխիան։

Հունվարի 25
Հայաստան - Չեխիա՝ 16:00
Հունվարի 28
Լիտվա - Հայաստան՝ 22:30