Շիրակի քրեական ոստիկանները ապօրինի զենք-զինամթերք պահելու և թմրանյութ օգտագործելու կասկածանքով ձերբակալել են երիտասարդի

Քրեական ոստիկանության Շիրակի մարզային վարչության ծառայողները ստացել էին օպերատիվ տեղեկություն` զենք-զինամթերք ապօրինի պահելու վերաբերյալ:

Նոյեմբերի 14-ին Գյումրու Պարույր Սևակի փողոցում քրեական ոստիկանները հայտնաբերեցին և վարչություն ներկայացրին 30-ամյա և 32-ամյա երիտասարդների, իսկ 30-ամյա գյումրեցու մեքենան տեղափոխվեց պահպանվող հատուկ տարածք։ 30-ամյա երիտասարդը հայտնեց, որ բնակարանում զենք, իսկ մեքենայում՝ թմրամիջոց է պահում։ Կազմված փաստաթղթերը ներկայացվեցին նախաքննական մարմին։

Նախաձեռնված քրեական վարույթի շրջանակում նրա բնակարանի զննությամբ հայտնաբերվեց «Մակարով» տիպի ատրճանակի նմանվող առարկա՝ պահունակով, իսկ մեքենայի զննությամբ` շուրջ 5 գրամ մարիխուանա։ Ըստ նրա` զանգվածն ինքն է պատրաստել՝ անձնական օգտագործման համար։ Երիտասարդը տեղափոխվել է ձերբակալվածների պահման վայր։ Նախաքննությունը շարունակվում է։